Raporti/ Putini ka humbur të gjithë tanket që filloi luftën

Presidenti rus Vladimir Putin ka humbur pothuajse të gjithë tanket që kishte kur filloi pushtimin ndaj Ukrainës pothuajse 2 vjet më parë. Moska ka humbur pothuajse 3 mijë automjete të blinduara që nga fillimi i luftës dhe tani po përdor edhe armë të ndryshkura të Luftës së Ftohtë.

Ish-komandanti Ben Barry, i cili ka shërbyer në Ushtrinë Britanike, i tha gazetës “The Sun” se forcave të Putinit u kanë mbetur ndoshta 2 deri në 3 vjet burime. Ai shpjegoi se ushtria ruse po mbështetet tashme tek “depot dhe magazinat me stoqe automjetesh të mbetura nga Lufta e Ftohtë”. Eksperti i sigurisë thotë se Putin po i jep më shumë rëndësi sasisë se cilësisë pasi shumica e municioneve të epokës sovjetike janë mbi 50-vjeçar.

Ekspertët paralajmërojnë se bota është në një situatë “të paqëndrueshme” dhe po përballet me një “dekadë të rrezikshme” për shkak të luftës së Putinit në Ukrainë si dhe vatrave të tjera të konfliktit të shpërndara në botë. Analistët kanë frikë se pa mbështetjen perëndimore, shterimi i municioneve mund të jetë katastrofik edhe në Ukrainë.

Barry thotë për “The Sun” se teknika e Rusisë në fushën e betejës me sulme të qëndrueshme dhe shumë të përgjakshme do të godiste Ukrainën shumë më fort pa mbështetjen e Europës dhe SHBA-së. “Rusia, mendoj se në një afat të afërt, shpreson se mund t’i kalojë mbështetësit perëndimorë të Ukrainës” – thotë ai.

Dr. Bastian Giegerich, Drejtor i Përgjithshëm i IISS dhe mbrojtjes thotë se lufta ka “treguar mangësi tek forcat e armatosura të Rusisë”. Ai shpjegoi se Rusia ka humbur rreth 1120 tanke vetëm gjatë vitit të kaluar. Ata kanë parë gjithashtu rreth 2000 personel të blinduar dhe automjete luftarake të këmbësorisë të shkatërruara. Shifra totale e tankeve të humbura arrin në më shumë se 3000 që nga fillimi i luftës.

“Humbjet e tankeve të Rusisë në fushën e betejës janë më të mëdha se numri që kishte kur nisi ofensivën e saj në 2022. Moska ka mundur të mbushë boshllëqet, por automjetet që po dalin nga objektet e Rusisë në shumicën e rasteve nuk janë të reja. Rusia i ka nxjerrë pajisjet nga magazinimi dhe i ka futur në betejë” – thotë Giegerich.

Ai thotë se Putini mund të jetë në gjendje të vazhdojë ta bëjë këtë vetëm për “2 deri në 3 vjet të tjera”. Ndërkohë, kjo do të thotë se ushtria e tij duhet të sakrifikojë “cilësinë për sasinë”. Hulumtimi zbuloi gjithashtu se Rusia ka humbur rreth 5500 automjete të blinduara që nga fillimi i pushtimit dhe rreth 500 raketahedhës të shumëfishtë. Përllogaritjet e Ukrainës thonë se humbja e ushtarëve rusë është 400 mijë, anijet dhe varkat në 24 dhe avionët e humbur në 657.

Ekspertët tregojnë përpjekjet e Putinit për të kontrolluar narrativën rreth luftës, duke paraqitur një pamje të rreme se si Rusia po i reziston kundërofensiveve ukrainase. Douglas Barrie, një ekspert ushtarak thotë se komentet e Putinit në intervistën Tucker Carlson për epërsinë e raketave ruse me rreze të gjatë veprimi ishin të pabaza.

“Për të qenë i sinqertë, nëse shikoni në të vërtetë sistemet që ata kanë përdorur nuk i vërtetojnë pretendimet e tij. Kur ai foli për armë të ndryshme çudibërëse, mjaft nga ato armë të mrekullueshme mbeten në zhvillim. Është një pyetje e hapur nëse do t’i shohim të gjitha ato që ndonjëherë të hyjnë në zbatim” – tha ai.

Rruga Press