Raport i Kongresit amerikan nxjerr “të palarat”: Ish-ministri Behgjet Pacolli shpenzoi 5000 euro në hotelin e Trumpit, bashkë me zyrtarë të tjerë
Kosova është ndër 20 shtetet, qeveritë e të cilave shpenzuan gati 8 milionë dollarë në total, në pronat e Donald Trumpit, në kohën sa ai ishte president i Shteteve të Bashkuara të Amerikës, sipas një raporti të Partisë Demokratike në Kongresin Amerikan të enjten.
Kina është shteti që ka shpenzuar shumicën e këtyre mjeteve me 5.5 milionë dollarë në pronat e Trumpit në New York, Washington e Las Vegas. Arabia Saudite dhe familja mbretërore kanë shpenzuar më shumë se 600 mijë euro. Gjetjet janë kulmi i hetimit shumëvjeçar nga Demokratët e Dhomës së Përfaqësuesve, që kanë hetuar nëse Trumpi ka përfituar personalisht nga koha e tij në poste publike. Në këtë listë, Kosova del se ka shpenzuar afro 5 mijë euro. Sipas raportit, zyrtarë të Kosovës në korrik të 2018-s kanë shpenzuar gati 5 mijë euro në Hotelin Trump International në Washington DC.
Në raport thuhet se ka postime në rrjete sociale që tregojnë se zyrtarët e Kosovës kanë qëndruar sërish në këtë hotel, por se ato s’janë dëshmuar me dokumente.
Sipas raportit, qëndrimi në këtë hotel i Behgjet Pacollit, si zëvendëskryeministër atë kohë dhe ministër i Jashtëm, kushtoi rreth 990 dollarë më 25 dhe 26 korrik 2018. Ndërsa qëndrimi nga 25 korriku deri më 28 të atij muaji, më 2018, nga zyrtarët e tjerë të Ministrisë së Punëve të Jashtme, kushtoi 3960 dollarë. Në total, pagesat nga Kosova kanë qenë 4950 dollarë. Siç shkruan në raporte, Pacolli ishte i përcjellë nga dy zyrtarë, përfshirë këshilltarin Jetlir Zyberaj. Të dhënat janë nxjerrë nga dokumentet e “Mazars”, kompania e Trumpit për kontabilitet.
Jamie Raskin, shefi i Demokratëve, ka thënë se shifrat janë vetëm “një fraksion” i shpenzimeve të qeverive të huaja në pronat e ish-presidentit dhe vlejnë për vetëm dy nga katër vjetët e tij në presidencë.
“Duke i vënë interesat personale financiare dhe prioritetet e politikës së fuqive të huaja të korruptuara mbi interesin publik amerikan, ish-presidenti Trump ka shkelur urdhrat e qarta të Kushtetutës dhe precedentin e vënë me kujdes e të respektuar nga çdo komandant i përgjithshëm në të kaluarën. Është e vërtetë që 7.8 milionë dollarë janë vetëm një pjesë e vogël e të korrave të parave të paligjshme të shtetit të huaj, por kjo shifër në vetvete është skandal dhe nxitje e rëndësishme për të vepruar”, ka thënë Raskin, raporton “Forbes”.
Në këtë listë janë përmendur edhe kryeministri i Shqipërisë, Edi Rama, qeveritë e Katarit, Kuvajtit, Indisë, Malajzisë, Afganistanit, Filipineve, Emirateve të Bashkuara Arabe, Kongos, Kazakistani, Tajlandë, Qiproja veriore, Mongolia, Libani, Letonia, Turqia, Hungaria e Qiproja.
Rruga Press