Qoku: DASH-i na zbuloi që Ali Ahmeti përmes Artan Grubit ka qenë bashkëpunëtor i ngushtë i dy zyrtarëve më antishqiptarë maqedonas

Shkruan Bekim Qoku

Dy nga politikanët më antishqiptarë që nga pavarësia e MV, por besa edhe më herët, ish KM i Maqedonisë Nikolla Gruevski dhe familjari i tij, ish kryespiuni Sasho Mijallkov, kanë pasur bashkëpunëtorë dhe shërbëtorë të ngushtë nga radhët e politikanëve shqiptarë të nivelit më të lartë.

Këta të dy ish zyrtarë të lartë shtetëror janë përgjegjës për raste të montuara si Monstra, për Lagjen e Trimave, për ngjarjet e Kuvendit të 27 prillit, për persekutime, torturime dhe eliminime të shumë shqiptarëve, për nxitje trazirash e urrejtjes ndaj shqiptarëve dhe plot raste e bëma të tjera.

Nga përgjimet që vetë Gruevski dhe Mijallkovi i kryen, dëgjuam si Menduh Thaçi i betohet se do jetë me të deri në vdekje. Gojën plot shqiptari, punët plot tradhti.

Tani DASH na zbuloi, atë që në fakt e dinin të gjithë që Ali Ahmeti përmes mashës dhe hijes së tij Artan Grubi ka qenë bashkëpunëtor i ngushtë i këtyre dy zyrtarëve më antishqiptarë maqedonas.

Ali Ahmeti me disa satelitë të tij bënë çmos që ta kthejnë Gruevskin ligjerisht nga azili në Hungari. Ndryshuan Ligjin e kodit penal për t’ia vjetërsuar veprat penale dhe t’i mundësohet kthimi.

Përdorën gjykatësit e tyre për t’ia mbajtur lëndët në sirtar Sasho Mijallkovit që, përmes Ligjit të ri të kodit penal, ta ambistojnë. Kështu ata e nxorën shpejt nga burgu si shërbim për punët e tyre të përbashkëta.

Këto janë gjëra që dihen publikisht.

Pyetja më e rëndë është se cilat janë koncesionet tjera që i kanë bërë me ta? Sa dhe çfarë shërbime të tjera i kanë bërë njerëzit e BDI-së dhe satelitët e tyre këtyre dy ish zyrtarëve skajshmërisht antishqiptarë, sa çështje e investime të interesit publik i kanë shitur për interesa të tyre private?

Të mos harrojmë, ju lutem, as shërbëtorët e kryeshërbëtorëve të Sasho Mijallkovit. Ata që kanë ndarë tavolinën dhe pushtetin me Ali Ahmetin dhe mashën e tij Artan Grubi e kanë ditur shumë mirë kush janë këta bashkëpunëtorë të ngushtë dhe lidhjet e tyre.

Rruga Press