Qeveria e Kosovës buxhetoi 2 milionë euro për Luginën e Preshevës

Qeveria e Kosovës në projektligjin për buxhetin e vitit 2022 ka ndarë 2 milionë euro për Luginën e Preshevës.

Këtë e ka bërë të ditur kryeministri Albin Kurti gjatë mbledhjes së Qerverisë.

“Për herë të parë kemi buxhetuar mbështetje për Luginën e Preshevës, në shumë prej 2 milionë eurove”, tha Kurti në mbledhje.

Kurti po ashtu bëri të ditur se janë shtuar 35 milionë euro te pensionet dhe skemat sociale, si dhe 24 milionë euro të tjera shtesë për sigurimin e barnave esenciale.

Qeveria e Kosovës në mbledhjen e saj të 43-të ka miratuar buxhetin për vitin 2022. Ministri i Financave, Hekuran Murati, tha se buxheti ka për qëllim riorientimin e ekonomisë drejtë eksportit.

Buxheti për vitin 2022, sipas shefit të financave të vendit, do të jetë 2.7 miliardë euro e që sipas tij, përfaqëson ndryshim në orientimin e financave publike.

Rruga Press