Putini paralajmëron bashkim të Bjellorusisë me Rusinë

Vladimir Putini ka thënë se presioni politik nga Perëndimi po përshpejtonte integrimin e Bjellorusisë me Rusinë.

“Presioni i paprecedentë politik dhe social nga i ashtuquajturi Perëndim kolektiv po na shtyn të përshpejtojmë procesin e bashkimit: së bashku për të minimizuar dëmet nga sanksionet e paligjshme, për ta bërë më të thjeshtë zotërimin e prodhimit të produkteve të kërkuara, për të zhvilluar kompetenca të reja, për të zgjeruar bashkëpunimin me vendet mike”, tha presidenti rus në një forum dypalësh mëngjesin e sotëm.

Vendet fqinje nënshkruan një Traktat të Bashkimit në vitin 1997 që synonte të rivendoste disa nga lidhjet e ngushta të prishura që nga rënia e Bashkimit Sovjetik.

Por, entuziazmi i presidentit autokrat të Bjellorusisë, Aleksandër Lukashenko, për një integrim më të ngushtë politik ka patur ulje-ngritje, ashtu si edhe varësia ekonomike e Bjellorusisë nga Moska.

Megjithatë, Lukashenko u bë më i përkushtuar ndaj Rusisë në fund të vitit 2020, kur Putini dha mbështetje politike dhe financiare, teksa shtypi një valë protestash antiqeveritare të shkaktuara për arsye të zgjedhjeve presidenciale që opozita – dhe vëzhguesit ndërkombëtarë – thanë se ishin manipuluar.

©Rruga Press