Putini flet për mercenarët famëkeq: Wagneri financohej nga Rusia

Presidenti rus Vladimir Putin ka thënë se anëtarët e grupit mercenar Wagner financoheshin plotësisht nga shteti, shkruan BBC.

Sipas Putinit, Wagnerit iu dhanë 86.2 miliardë rubla (1 miliard dollarë) vetëm nga maji 2022 deri në maj 2023 për paga dhe shpërblime, të cilat erdhën nga Ministria e Mbrojtjes dhe buxheti i shtetit rus.

Revolta e mercenarëve Wagner të shtunën tronditi Rusinë.

Udhëheqësi i saj, Yevgeny Prigozhin, mbërriti në Bjellorusi të martën pasi ra dakord të largohej nga Rusia.

Të shtunën, trupat mercenare të udhëhequra nga shefi i Wagnerit, Yevgeny Prigozhin, pushtuan qytetin jugor rus të Rostov-në-Don, marshuan drejt Moskës dhe rrëzuan helikopterët ushtarakë rusë dhe një aeroplan gjatë rrugës.

Rebelimi i tyre më vonë u ndërpre pasi u arrit një marrëveshje me ndihmën e Lukashenkos.

Autoritetet ruse thanë se Wagner do të çarmatoset, por anëtarët do t’i shpëtojnë ndjekjes penale për rebelimin jetëshkurtër.

“Ne gjithmonë i trajtuam me shumë respekt luftëtarët dhe komandantët e këtij grupi, sepse ata vërtet treguan trimëri dhe heroizëm”, ka thënë Putin.

Putini ka shtuar se autoritetet do të shqyrtojnë se si janë shpenzuar paratë e paguara për Wagner dhe udhëheqësin e tij.

Rruga Press