Prindër e nxënës protestojnë kundër mësimit pasdite në Pojan

Prindërit e 150 fëmijëve të shkollës “Bardhyl Pojani” në fshatin Pojan të Maliqit kanë denoncuar faktin se fëmijët nga klasa e parë në të pestën zhvillojnë mësimin pasdite.

Për prindërit kjo situatë është shqetësuese pasi fëmijët përfundojnë mësimin në 17:00, e nuk mund të shkojnë vetëm në shtëpi, shtuar këtu edhe faktin e errësirës dhe të ftohtin e dimrit.

“Për fëmijët është e vështirë, orari është shumë i vonë, edhe unë nuk mundem të vij vetëm në këtë orë që nga fshati për ta marrë vajzën”, u shpreh një nënë.

“Kam dy vajza në shkollë pasdite, ato kanë frikë të kthehen vetëm”, u shpreh një baba.

Fëmijët janë të lodhur, të papërqendruar në mësim e shpesh e kanë mendjen tek ushqimi, thonë prindërit. Shtimi i ambienteve për zhvillimin normal të mësimit është zgjidhja, sipas tyre.

“Jam 72 vjeç, pres fëmijën të dalë. Nuk e lë dot të vijë vetëm”, tha një gjyshe.

Vetë fëmijët shprehen se do dëshironin që mësimin ta zhvillonin paradite.

Aktualisht mësimin me turne po e zhvillojnë edhe 2 shkolla në Korçë, 1 në Maliq dhe 2 në Pogradec.

Shkolla në Pojan ka kapacitet për 350 nxënës, ku ndërkohë në momentalisht marrin dije me tepër se 500 fëmijë.

Drejtoria Arsimore e bashkia shprehen se kërkohen fonde qeveritare për shtimin e ambienteve ndërkohë që për këtë, premtim ka pasur e nga kryeministri Rama në zgjedhjet e fundit parlamentare. Një premtim që ende nuk është mbajtur.

Rruga Press