Përshkallëzim në Serbi, përkrahësit e partisë së Vuçiqit dhe policia përballen me protestuesit – Pamje

Përkrahës të Partisë Përparimtare Serbe (SNS), të mbrojtur nga policia, u përplasën sërish me protestues në qytetet kryesore të Serbisë të enjten në mbrëmje, derisa protestat disa mujore kundër korrupsionit shpërthyen në trazira civile për natën e pestë radhazi.

Në qytete dhe fshatra në mbarë vendin, protestuesit kryesisht demonstruan para zyrave të Partisë (SNS), të cilat ishin të ruajtura: aktivistë të partisë – burra të fuqishëm të armatosur me fishekzjarrë, gurë, shishe dhe shkopinj druri – dhe policia. Autoritetet thanë se disa dhjetëra persona u arrestuan gjatë përplasjeve.

Në një incident të parë nga një gazetar i BIRN në Beograd, aktivistët e SNS-it qëllimisht sulmuan gazetarët që po mbulonin protestën. Gazetarët e BIRN thanë se policia dukej se përpiqej vetëm të shpërndante protestuesit, ndërsa toleronte dhunën e aktivistëve të partisë SNS.

Në qytetin e dytë më të madh, Novi Sad, ku një aksident fatal në stacionin hekurudhor shkaktoi shpërthimin fillestar të protestave në nëntor të vitit të kaluar, tre zyra të SNS-it u shkatërruan nga protestuesit. Protestuesit akuzojnë Presidentin Aleksandar Vuçiq dhe partinë e tij SNS, që është në pushtet prej 13 vitesh, për korrupsion dhe autoritarizëm.

Ministria e Brendshme këmbënguli se përdorimi i forcës nga ana e policisë ishte i justifikuar për të përballuar dhunën nga protestuesit.

Në Beograd, përleshjet shpërthyen pranë zyrës së partisë në pushtet në rrugën Kneza Milosa, në qendër të qytetit, pranë kompleksit qeveritar dhe përpara tre zyrave të partisë SNS në lagjen Novi Beograd.

Në qendër të qytetit, pasi protestuesit u penguan të afroheshin te zyra e SNS-it, shpërthyen përleshje kur fishekzjarre u hodhën drejt aktivistëve të SNS-it, të cilët u kundërpërgjigjën me mjete piroteknike më të rrezikshme.

Ndërsa policia filloi të shtynte protestuesit nga zyra e SNS-it, një grup gazetarësh dhe qytetarësh që ndodheshin mes rreshtave u sulmuan nga aktivistët e SNS-it, të cilët i shanin dhe i kërcënonin, duke i ndjekur nëpër një nga rrugët aty pranë. Kjo shkaktoi panik, ndërsa njerëzit iknin për të gjetur strehim apo për të shpëtuar.

Protestuesit u shtynë deri në sheshet kryesore Terazije dhe Slavija, ku – sipas videove të postuara në rrjete sociale – policia përdori forcë ndaj tyre, duke i ndjekur për rreth tre orë, herë pas here duke përdorur gaz lotsjellës.

Një anëtar i Partisë së Lirisë dhe Drejtësisë në opozitë, deputeti Pedja Mitroviq, pësoi lëndime në kokë, duke deklaruar se ishte sulmuar nga “shtatë apo tetë huliganë të maskuar”.

“Ata filluan të më godisnin në kokë dhe këmbë me shkopinj, më ngacmuan, më ofenduan. Kur kuptova që nuk e dinin çfarë po bënin dhe se situata mund të përshkallëzohej, u fsheha dhe u largova me vrap, sepse pashë që po përballesha me njerëz që qartazi nuk ishin në gjendje normale,” tha Mitroviq pas sulmit.

Në lagjen Novi Beograd, policia përdori gaz lotsjellës për të shtyrë protestuesit larg selisë lokale të SNS-it, ku ishin mbledhur njerëzit.

Kur protestuesit u zhvendosën te një zyrë tjetër më e vogël e SNS-it disa rrugë më tej, policia reagoi ashpër ndaj fyerjeve dhe hedhjes së bombave tymuese nga pjesëmarrësit, duke hedhur disa granata lotsjellëse . Disa prej tyre u hodhën drejt protestuesve që ndodheshin më larg nga kordoni policor dhe zyra e SNS-it.

Rreth orës 23:00, kur protestuesit dogjën një kontejner, më shumë forca policore mbërritën me të paktën shtatë automjete të blinduara, duke i shtyrë protestuesit edhe më tej nga zyrat e SNS-it. Disa dritare makinash të parkuara në lagje u thyen.

Në qytetin Novi Sad, ku kishte pasur përleshje të ashpra edhe netët e mëparshme teksa përkrahësit e SNS-it hodhën fishekzjarrë ndaj protestuesve, prania e shtuar e policisë dhe ushtrisë pranë zyrave të partisë shkaktoi edhe më shumë zemërim tek protestuesit.

Tre zyra të partisë, në rrugën Strazhilovska, Bulevardin e Çlirimit dhe rrugën Kosovska, u shkatërruan nga protestuesit. Të gjitha zyrat ishin bosh dhe të paarmatosura.

Pas shkatërrimit të zyrës në rrugën Kosovska, policia ndërhyri për të shpërndarë protestuesit, duke përdorur forcë dhe gaz lotsjellës.

U raportua gjithashtu për përdorim force nga policia ndaj protestuesve në qytetet Nish, Valjevë  ndërsa në qytete të tjera protestat u zhvilluan pa incidente.

Ministri i Brendshëm serb, Ivica Daçiq, i tha mediave rreth mesnatës se 37 persona ishin arrestuar deri atëherë, shumica në Beograd, por paralajmëroi se do të ketë më shumë arrestime.

Daçiq justifikoi përdorimin e forcës nga policia me pretendimin se protestuesit po sulmonin oficerët.

“Policia ndërhyri, duke përdorur agjentë kimikë kur ishte e nevojshme, për të ndalur sulm ndaj forcave të rendit,” tha ai.

Përplasjet  e ditëve të fundit vijnë pas muajsh protestash të udhëhequra nga studentët- që shpërthyen në nëntor, si pasojë e zemërimit ndaj korrupsionit pas tragjedisë në stacionin hekurudhor të Novi Sadit./BIRN

Rruga Press