Pedagogu Ervin Goci apel gazetarëve: Lidhuni direkt me protestuesit, shkëmbeni numrat me ta

Nga Ervin Goci

Kam një apel për gazetarët:

Gjatë kohës që jeni në terren, lidhuni direkt me protestuesit, shkëmbeni numrat me ta, identifikojini, shihni nëse janë arrestuar ose jo, takojini, intervistojini, shkoni në banesat e tyre, flisni me familjarët, nëse janë dhunuar denonconi në emër të tyre, krijoni një databazë me profilet e tyre, sigurisht ata që duan të identifikohen.

Është thelbesore të mediatizohet çdo mendim që ata kanë, historitë e tyre, mjedisi ku jetojnë, aftësitë e tyre, dëshirat e tyre, ëndrrat e tyre..në këtë aspekt intervistoni kot mediatorë të nderuar, duke përfshirë dhe mua, nga perspektiva e tyre askush nuk ka ndonjë gjë thelbësore për të thënë.

Bëni grassroot reporting, një zej i ri mes aktivizmit dhe raportimit, mos u intimidoni se mund të dukeni pak subjektiv, në një realitet ku kryefjala është huri, nuk ka se për çfarë të mbahet objektivitet.

Roli juaj është thelbësor në këto momente, lërini kamerat e rënda dhe kapni paisjet mobile. Ndizni celularët, go-pro-të, kamerat dixhitale në miniaturë, dhe raportoni këtë masakër që po kryhet mbi pjesën më të shëndetshme të shoqerisë.

Rruga Press