Partitë politike shqiptare në Mal të Zi drejt bashkimit

Partitë politike shqiptare në Mal të Zi drejt bashkimit në një subjekt të ri politik Sipas RTCG, partitë politike shqiptare në Mal të Zi po përgatiten për bashkimin në një organizatë të vetme politike të quajtur “Forumi Shqiptar”, ku pritet të përfshihen Alternativa Shqiptare, Lidhja Demokratike e Shqiptarëve dhe Unioni Kombëtar Shqiptar. Lider i mundshëm i këtij subjekti të ri politik përmendet Nik Gjeloshaj.

Partitë politike shqiptare në Mal të Zi po përgatiten për bashkimin formal në një subjekt të vetëm politik me emrin “Forumi Shqiptar”, raporton RTCG.

Sipas informacionit të publikuar nga shërbimi publik, në këtë aleancë të re politike pritet të bashkohen Alternativa Shqiptare, Lidhja Demokratike e Shqiptarëve dhe Unioni Kombëtar Shqiptar.

Siç thuhet, vendimi për bashkim është rezultat i sukseseve të deritanishme të veprimit të përbashkët politik, përfshirë udhëheqjen në komunën e Tuzit, si dhe fitimin e dy mandateve parlamentare dhe dy vendeve në Qeverinë e Malit të Zi.

Burime pranë negociatave theksojnë se një shtysë shtesë për bashkimin ka ardhur edhe nga rezultatet e fundit të sondazheve të opinionit publik, të cilat tregojnë rritje të mbështetjes për Forumin, veçanërisht në Ulqin, ku po shfaqet si një nga forcat më të forta politike shqiptare.

Sipas këtyre informacioneve, një nga synimet kryesore të subjektit të ri politik do të jetë forcimi i pozicionit në Ulqin pas zgjedhjeve të ardhshme.

Po sipas të njëjtave burime, pothuajse e sigurt është që lider i organizatës së re do të jetë Nik Gjeloshaj, ndërsa në procesin e negociatave kanë marrë pjesë edhe Ivan Ivanaj dhe Ferhat Dinosha.

Bashkëbiseduesit vlerësojnë se kjo mund të jetë konsolidimi më i madh i faktorit politik shqiptar në Mal të Zi që nga pavarësia e vendit.

Rruga Press