Osmani për ambasadorin Berishaj: Ne i besojmë ambasadorit tonë

Presidentja e Kosovës, Vjosa Osmani, ka thënë se i beson ambasadorit të Kosovës në Kroaci, Martin Berishaj, pasi ai u përmend në një raport të një mediumi slloven të enjten për përfshirje në një skandal financiar.

Osmani është përgjigjur në pyetjen rreth rastit të Berishajt gjatë konferencës me presidentin leton, e ku tha se një gjë e tillë nuk është konstatuar nga asnjë organ i drejtësisë, “por thjesht është shkruar nga një media, për të cilën ambasadori e ka mohuar në tërësi dhe do të ndjek të gjitha rrugët ligjore drejt një gjëje të tillë”.

Osmani citoi një thënie të presidentit amerikan duke nënkuptuar se akuzat për Berishajn janë dezinformata.

“Atyre që publikohen, siç e ka thënë presidenti Biden: rreziku më i madh për demokracinë tonë nuk janë vetëm tanket, por edhe dezinformatat. Si presidente pres që çdo gjë që publikohet të konfirmohet, dhe nëse nuk konfirmohen ne procedojmë ashtu si i kemi marrë vendimet tona dhe ne i besojmë ambasadorit të Republikës sonë kur mohon akuza të tilla”.

Rruga Press