OKB kritikon ashpër Izraelin për Gazën: Vratë më shumë fëmijë se sa vrasin konfliktet kudo në 1 vit
Këshilli i Sigurimit i Kombeve të Bashkuara u mblodh në mënyrë urgjente. Gjatë një debati të ashpër, Izraelit iu kërkua të ndalojë ndëshkimin kolektiv të palestinezëve në Gaza në luftën e nisur ndaj Hamas.
“Rreth 70 për qind e personave të vrarë janë fëmijë dhe gra. Save the Children raportoi së fundmi se rreth 3200 fëmijë u vranë në Gaza në vetëm tre javë. Kjo e tejkalon numrin e fëmijëve të vrarë çdo vit në zonat e konfliktit në botë që nga viti 2019. Ky nuk mund të jetë ‘dëm kolateral’”, deklaroi Philippe Lazzarini, udhëheqësi i Agjencisë së OKB për refugjatët palestinezë.
“Në emër të të gjithë fëmijëve të kapur në këtë makth, ne i bëjmë thirrje botës të bëjë më mirë. Fëmijët nuk fillojnë konflikte dhe janë të pafuqishëm për t’i ndalur ato”, u shpreh Catherine Russell, Drejtore Ekzekutive, UNICEF.
Lisa Doughten, Drejtoreshë, Divizioni i Financimit Humanitar dhe Mobilizimit të Burimeve, Zyra për Koordinimin e Çështjeve Humanitare (OCHA)
“Njerëzit po bëhen gjithnjë e më të dëshpëruar, teksa kërkojnë ushqim, ujë dhe strehë mes një fushate të pamëshirshme bombardimi që po fshin familje të tëra dhe lagje të tëra.”
Ata shprehën shqetësim për 64 punonjësit humanitarë që kanë humbur jetën në Gaza, ndërsa kritikojnë ashpër Izraelin për trajtime çnjerëzore të palestinezëve. “Mizoritë e Hamasit nuk e lirojnë shtetin e Izraelit nga detyrimet e tij sipas të Drejtës Ndërkombëtare Humanitare. Çdo luftë ka rregulla dhe kjo nuk bën përjashtim”, theksoi Lazzarini. Kundërpërgjigja e Izraelit dhe Palestinës ishte kjo:
Riyad H. Mansour, Vëzhgues i Përhershëm në Kombet e Bashkuara, Shteti i Palestinës: “Çdo minutë që kalon ka rëndësi për të arritur paqen. Çdo minutë është dallimi mes jetës dhe vdekjes për palestinezët në Gaza”.
Gilad Erdan, Përfaqësues i Përhershëm në Kombet e Bashkuara, Izrael: “Ne do ta mbajmë këtë yll derisa të dënoni mizoritë e Hamasit dhe të kërkoni lirimin e menjëhershëm të pengjeve tanë. Ne mbajmë një yll të verdhë si një simbol krenarie, një kujtesë që u betuam të luftonim për t’u mbrojtur.”
Ai mori kritika të shumta në arenën ndërkombëtare por edhe brenda Izraelit për këtë, pasi ylli i verdhë është përdorur edhe nga liderët nazistë për të identifikuar hebrenjtë. Shpesh është konsideruar si një yll i turpit. Në selinë e OKB-së ishte I pranishëm edhe ministri i Jashtëm izraelit, Eli Cohen, i cili kishte fjalë të forta për Sekretarin e Përgjithshëm të OKB-së Antonio Guterres, duke kërkuar dhe dorëheqjen e tij pasi kërkon mbrojtjen e civilëve palestinezë.
Eli Cohen, Ministër i Jashtëm I Izraelit: “Hamasi është më i keq se ISIS. Dhe siç thotë kancelari Scholz, ata janë nazistët e rinj. Nuk ka dy palë në këtë moment. Ka vetëm një anë për të mbështetur, përballë agresionit të ISIS. Prandaj, vendosa të anuloj takimin tim me Sekretarin e Përgjithshëm, pasi ne kemi nevojë për një zë të qartë dhe të lartë në lidhje me atë që ndodhi. Ne jemi këtu për të thënë, kurrë më.”
Rruga Press