Njësoj si Rama? Del dokumenti ku Serbia kërkon që veriun ta marrë nën kontroll KFOR-i

Serbia ka kërkuar që KFOR-i të marrë nën kontroll veriun dhe të fillojë një hetim ndërkombëtar.

Në dokumentin që atashetë ushtarakë të Serbisë kanë shpërndarë nëpër ambasadat e tyre në botë, e të cilin e ka siguruar RTK, kërkesat kryesore të Serbisë për komunitetin ndërkombëtar, pas siç thuhet në dokument “zhvillimeve të fundit në Kosovë”, janë që KFOR-i të marrë nën kontroll të plotë veriun e Kosovës, duke zëvendësuar Policinë e Kosovës, dhe që të fillojë një hetim ndërkombëtar mbi atë se çfarë ka ndodhur me 24 shtator.

Aty thuhet se duke pasur si top prioritet ruajtjen e paqes dhe shmangien e konflikt, KFOR-i duhet të marrë përsipër të gjitha aspektet e sigurisë dhe menaxhimin e veriut, duke zëvendësuar Policinë e Kosovës, deri sa të krijohen kushtet për rikthimin në dialogun e lehtësuar nga Brukseli, organizimin e zgjedhjeve të reja në komunat veriore, themelimin e Asociacionit të Komunave me Shumicës Serbe dhe të sigurohet përfshirja dhe riintegrimi i serbëve lokalë të Kosovës në Policinë e Kosovës.

Kujtojmë që këtë dëshirë të Serbisë e trumpetoi fuqishëm edhe Kryeministri i Shqipërisë duke deklaruar që KFOR-i duhet të marrë nën kontroll veriun, ndërkohë që i njejti, disa muaj më parë kishte deklaruar që nëse KFOR-i e merr veriu kjo do ishte një katastrofë për Kosovën.

Rruga Press