Ngrihet aktakuzë për krime në kampin Uzamnica në Visegrad
Prokuroria shtetërore e Bosnjës ka ngritur një aktakuzë kundër Milomir Djuriciç “Djure” dhe Vukadin Spasojeviç, i njohur gjithashtu si “Mico” dhe “Era”, duke i akuzuar ata për krime kundër njerëzimit në zonën lindore të Visegradit të Bosnjës.
Aktakuza e prokurorisë, e depozituar në Gjykatën Shtetërore për konfirmim, pretendon se Djuriciç dhe Spasojeviç kryen persekutim në baza kombëtare, etnike dhe fetare si pjesë e një sulmi të gjerë dhe sistematik që synonte popullsinë boshnjake në komunën e Visegradit, nga maji 1992 deri në fund të shtator 1993.
Sipas prokurorisë, Djuriciç ka vepruar në cilësinë e menaxherit të kampit të paraburgimit në Uzamnica dhe Spasojeviç si roje në kamp. Të dy burrat janë ish-anëtarë të Brigadës Visegradska të Ushtrisë Serbe të Bosnjës.
“Në disa raste, ata ndërmorën veprime të përfshira në ndalimin e paligjshëm, torturim, abuzim dhe akte të tjera çnjerëzore kundër civilëve të ndaluar, duke përfshirë përdhunimin dhe abuzimin seksual të viktimave në mënyra jashtëzakonisht poshtëruese, si dhe mbajtjen e të burgosurve në kushte jashtëzakonisht çnjerëzore, gjë që ka lënë pasoja të përhershme fizike dhe mendore te viktimat. Spasojeviç është akuzuar gjithashtu se ka dhënë urdhra për keqpërdorim të viktimave”, tha prokuroria.
Sipas njoftimit, prokuroria do të përpiqet t’i vërtetojë pretendimet e saj duke thirrur 19 dëshmitarë, mes të cilëve katër të mbrojtur dhe duke paraqitur disa dhjetëra prova materiale./birn/