Nga pikat kufitare në veri, MPB Sveçla: Të përkushtuar maksimalisht në luftimin e grupeve kriminale
Ministri i Punëve të Brendshme, Xhelal Sveçla, ka vizituar sot pikat kufitare në Jarinë dhe Bërnjak, si dhe Shapjtejin ku sot në orët e hershme të mëngjesit është sulmuar patrulla e Policisë së Kosovës.
Ministri Sveçla, ka thënë se në orët e hershme të mëngjesit, nga grupe kriminale janë sulmuar me mjete shpërthyese veturat e policisë kufitare.
“Sulmi ka ndodhur derisa zyrtarët policor po kontrollonin në rrugët e kontrabandës, të cilat i kemi mbyllur. Gjendja shëndetësore e zyrtarëve policor është e mirë dhe nuk ka dëme materiale”, ka shkruar Sveçla në një postim në Facebook.
Ai më tej ka bërë të ditur se “sot kam vizituar pikat kufitare Jarinje e Bërnjak, si dhe në Shaptej vendi ku ka ndodhur sulmi i mbrëmshëm, si dhe në Izvor e Trebickë, ku Policia jonë kufitare mbikqyrë bllokimin e rrugëve ku më herët është zhvilluar kontrabanda”.
“Përkundër 5 sulmeve të njëpasnjëshme që kanë ndodhur ndaj zyrtarëve policor, puna e tyre po vazhdon me intensitet të njëjtë e me vigjilencë të shtuar”.
“Vazhdojmë bashkë e me përkushtim maksimal që të luftojmë çdo grup kriminal që me aktivitete ilegale cenojnë sigurinë e vendit tonë”, ka shkruar Sveçla.
Ministri Sveçla gjatë vizitës në brezin kufitar me Serbinë
Policia e Kosovës ka njoftuar sot në orët e hershme të mëngjesit të 16 prillit kanë ndodhur dy shpërthime në Sharpej të Jarinjës, ku gjendet pikëkalimi kufitar midis Kosovës dhe Serbisë, duke shtuar se nuk raportohet për persona të lënduar apo dëme materiale.
Sipas policisë, dyshohet se shpërthimet kanë ndodhur pranë një veture të policisë, janë kryer me mjete piroteknike. Policia tha se dyshon se këto mjete shpërthyese janë hedhur “nga territori i Serbisë”.
“Shpërthimet kanë ndodhur afër veturës së policisë e cila ishte në një pikë statike ku policia ishte e përqendruar në parandalim të kontrabandës në atë zonë”, thuhet në njoftim.
Gjithashttu autoritetet eKosovës më 15 prill bën të ditur se Policia e Kosovës ka qenë cak i disa sulmeve të kryera gjatë ditëve të fundit. Ministri i Punëve të Brendshme, Xhelal Sveçla, bëri të ditur se Policia e Kosovës ishte sulmuar më 15 prill, teksa ishte nisur për të marrë detyrën në pikat kufitare me Serbinë.
“Ky sulm, tashmë i faktuar, me granatë dore dhe AK-47, si një akt terrorist, është bërë me qëllim të frikësimit të zyrtarëve policorë, por edhe të të gjithë qytetarëve të Kosovës”, ka thënë ai.
Sulmet e ditëve të fundit ndaj Policisë në veri të Kosovës, zonë e banuar me shumicë serbe, u dënuan nga Ambasada amerikane në Prishtinë, Bashkimi Evropian dhe misioni i NATO-s në Kosovë, KFOR-i si dhe nga udëheqës shtetërorë dhe subjekte politike në vend.
Rruga Press