Ndonëse ka tejkaluar çdo afat ligjor, projekti i bursës së energjisë vijon të zvarritet
Bursa e Energjisë, një projekt i përfolur për vite me radhë si pjesë e ndryshimeve në tregun energjetik vijon të zvarritet. Pavarësisht se ka kaluar më shumë se një muaj nga vendimi i Komisionit të Prokurimit Publik, tenderi ende nuk është rihapur.
Sipas ekspertit Lorenc Gordani, “ka disa aspekte, aktualisht është në pritje të lançimit pas rishikimit të kritereve, pas ankimit të një kompanie sllovene, por duhet të niste shumë më herët”.
Nga 1 janari 2022 do të nisë edhe dalja në treg të lirë e bizneseve të lidhur në tensionin 20 KV, që sipas të dhënave zyrtare janë rreth 7200. Njohës të këtij tregu vlerësojnë se mungesa e bursës do vështirësojë procesin e rëndojë kostot për sipërmarrjen.
“Benefitet vijnë nga ndryshimi i qasjes. Do të kemi më shumë pjesëmarrës, ne po vuajmë nga rritja e çmimeve. Por jemi vendi i fundit që nuk ka ngritur bursa energjetike, diçka që është e detyruar“, shton Gordani për A2 CNN.
Ngritja e bursës së energjisë nënkupton listimin e prodhuesve të energjisë elektrike, çka do të rriste konkurrencën si dhe do të lehtësonte blerjen e saj nga të gjithë bizneset e liberalizur që sigurojnë vetë sasinë e nevojshme./a2/