“Ndihma vdekjeprurëse” e SHBA-së, arrijnë municionet në Kiev

January 22, 2022 user 1

Rreth 90 ton “ndihma vdekjeprurëse” të SHBA-së ka mbërritur në Ukrainë, mes tensioneve për grumbullimin e trupave ruse në kufi.

Kjo ishte dërgesa e parë e një pakete të miratuar së fundmi të ndihmës ushtarake të SHBA-së për Ukrainën, dhe përfshinte municione për “mbrojtësit e vijës së parë”.

Dorëzimi pasoi vizitën e Sekretarit të Shtetit të SHBA Antony Blinken në Kiev këtë javë, ku ai paralajmëroi për një përgjigje të ashpër nëse Rusia do të pushtonte, Ukrainën.

Moska ka mohuar çdo plan për të sulmuar apo pushtuar Ukrainën.

Megjithatë, presidenti i SHBA, Joe Biden, miratoi paketën e mbështetjes së sigurisë prej 200 milionë dollarësh në dhjetor.

Ambasada e SHBA në Kiev tha se dërgesa demonstroi “angazhimin e saj të vendosur ndaj të drejtës sovrane të Ukrainës për vetëmbrojtje”.

Lexo më shumë Ndërpriten mijëra fluturime – Rusia akuzohet se po ndërhyn në sistemet e navigimit të aeroplanëve në Evropë

“Shtetet e Bashkuara do të vazhdojnë të ofrojnë një ndihmë të tillë për të mbështetur Forcat e Armatosura të Ukrainës, në përpjekjet e tyre të vazhdueshme për të mbrojtur sovranitetin dhe integritetin territorial të Ukrainës kundër agresionit rus”, shkruante ambasada në Facebook.

Ministri ukrainas i Mbrojtjes Oleksiy Reznikov falënderoi SHBA-në për ndihmën.

Dërgesa ka mbërritur disa orë pasi ministri i jashtëm i Rusisë dhe homologu i tij amerikan mbajtën bisedime “të sinqerta”, në përpjekje për të reduktuar mundësinë e një konflikti më të gjerë në Ukrainë.

Rusia ka pushtuar më parë territorin ukrainas – Krimenë, në vitin 2014, dhe kreu i aleancës ushtarake të NATO-s ka paralajmëruar se ekziston një rrezik real i një konflikti të ri në Evropë pasi rreth 100,000 forca ruse u grumbulluan në kufi.

Lexo më shumë Kryeministri në ardhje i Serbisë: Do të mbajmë miqësinë me Kinën e Rusinë, nuk vendosim sanksione për luftën ruse në Ukrainë

Moska e ka mohuar se po planifikon një pushtim, por presidenti Vladimir Putin i ka bërë kërkesa Perëndimit, të cilat ai thotë se kanë të bëjnë me sigurinë e Rusisë, duke përfshirë ndalimin e Ukrainës për t’u bashkuar me NATO-n.

Ai gjithashtu dëshiron që NATO-ja të braktisë stërvitjet ushtarake dhe të ndalojë dërgimin e armëve në Evropën Lindore, duke e parë këtë si një kërcënim të drejtpërdrejtë për sigurinë e Rusisë.