NATO i tregon muskujt Rusisë, nisin “lojërat më të mëdha të luftës”

Janë cilësuar si “lojërat më të mëdha të luftës” në dekada. Bëhet fjalë për stërvitjen e re ushtarake të NATO-s, që do të nisë javën e ardhshme dhe do të përfshijë 90 mijë trupa, mes te cilëve edhe nga Suedia që ende nuk i është bashkuar aleancës.

Operacioni i pagëzuar si “Steadfast Defender 2024” ose “Mbrojtja e Palëkundur” do të të zgjasë disa muaj dhe synon të tregojë se NATO është në gjendje të mbrojë të gjithë territorin e vet nga agresioni i mundshëm i Rusisë. Këtë e tha Komandanti i Lartë i Aleancës për Europën, Christopher Cavoli.

“Këto do të jenë stërvitjet më të mëdha të NATO-s në dekada dhe do të simulojnë një skenar konflikti kundër një kundërshtari të afërt. Operacioni do të tregojë aftësinë e aleancës për të përforcuar zonën Euro-Atlantike, përmes lëvizjes së forcave nga Amerika e Veriut”, tha Christopher Cavoli, Komandant i Lartë për Europën.

Deklarata sugjeron se një numër i madh forcash amerikane do të stacionohen në kontinentin e vjetër për stërvitjet. Cavoli tha se operacioni do të tregojë unitetin, forcën dhe vendosmërinë e aleatëve për të mbrojtur njëri-tjetrin. Të paktën 1100 mjete luftarake do të marrin pjesë në lojërat e luftës, përfshirë 133 tanke dhe mjetë luftarake të këmbësorisë, bashkë me 50 anije, nga aeroplambajtëset te bombarduesit.

Atyre do t’i bashkohen 80 helikopterë, dronë dhe avionë lufte. Njoftimi vjen teksa lufta ruse në Ukrainë ka ngecur në një pikë të vdekur. NATO, si organizatë nuk është e përfshirë direkt në konflikt, por një sërë shtetesh anëtare e kanë mbështetur Kievin me armatime. Moska prej dekadash ka shprehur shqetësimin për zgjerimin e NATO-s drejt kufijve të saj, duke e konsideruar këtë si një kërcënim ekzistencial. 

Rruga Press