Ministri Sveçla: Synojmë një administratë efikase dhe shërbime të shpejta

Ministri i Punëve të Brendshme, Xhelal Sveçla përmes një postimi në Facebook ka thënë se për herë të parë në Kosovë po mbahet konferenca ndërkombëtare për reformë në Administratë Publike KosovaPAR 2023, e cila ka filluar sot punimet dhe do të vijojë edhe nesër.

“Bashkë me kryeministrin Albin Kurti, ambasadorin e Gjermanisë Jorn Rohde dhe Prof. Dr. Wolfgang Dreschler, hapëm sot punimet e kësaj konference e cila për dy ditë, përmes 15 paneleve dhe 5 sesioneve, panelistëve vendorë, ndërkombëtarë, shoqërisë civile e shërbyesve civil do të trajtojnë temën “Reformat në administratën publike për një qeverisje fleksibile dhe të qëndrueshme”, ka thënë Sveçla.

“Kisha kënaqësinë që në kuadër të konferencës të ndaja panelin me ministren e Shtetit për Marrëdhëniet me Parlamentin në Republikën e Shqipërisë Elisa Spiropali, zëvëndësministren e Punëve të Jashtme dhe Diasporës Liza Gashi dhe Prof. Dr Alketa Peci me të cilat biseduam për nevojën e reformimit të administratës publike me rëndësinë dhe sfidat e këtij procesi”, tha ai.

Kjo,  konferencë sipas Sveçlës, do të shërbejë për shkëmbimin e përvojave dhe praktikave më të mira për të realizuar synimet tona për një administratë efikase dhe shërbime të shpejta e të sigurta për të gjithë qytetarët tanë.

Rruga Press