Miliona euro, disa ton kokainë e 14 të arrestuar, policia gjermane shkatërron bandën ndërkombëtare të drogës

Policia gjermane tha të martën se 14 persona të dyshuar për kontrabandë të disa tonëve kokainë nga Amerika e Jugut në Gjermani u arrestuan dhe rruga e tyre e trafikut dhjetëvjeçar u çmontua si pjesë e një hetimi ndërkombëtar.

Njëzet e tetë të dyshuar akuzohen për lidhje me nëntë dërgesa që arrijnë në rreth pesë tonë kokainë, thanë në një deklaratë të përbashkët Zyra Federale e Policisë Kriminale të Gjermanisë (BKA) dhe zyra e prokurorit publik të Berlinit.

“Me urdhër-arrestet dhe kontrollet sot, ne kemi thyer zinxhirin e furnizimit” tha Kryeprokurori Georg Bauer.

Më shumë se 40 lokacione u kontrolluan në Gjermani dhe jashtë saj si pjesë e operacionit dhe policia sekuestroi prona me vlerë mbi 14 milionë euro (15.9 milionë dollarë) nga tetë persona.
Përveç zbatuesve të ligjit në Berlin dhe Dortmund, janë përfshirë edhe hetues në Letoni dhe Spanjë, tha policia.

Në shkurt, autoritetet doganore gjermane dhe belge kapën një sasi rekord prej mbi 23 ton kokainë në dy bastisje.

Konfiskimet e kokainës në Bashkimin Evropian arritën nivele rekord në 213 tonë në vitin 2019, sipas të dhënave më të fundit nga agjencitë e drogave të Kombeve të Bashkuara dhe BE-së.

Rruga Press