Mik i Radojiçiqit, parulla në Graçanicë, feston me Dodikun: Aktiviteti i errët i Danilos, djalit të Vuçiqit

Djali i presidentit serb, Danilo Vuçiq është i përfshirë në aktivitete politike të të atit. Danilo është fotografuar i shoqëruar me njerëz të dyshimtë ndërsa së fundmi është shfaqur në Republikën e Serbe, në ditën anti-kushtetuese të entitetit serb në Bosnje dhe Hercegovinë.

Aktiviteti i Danilos, djalit të Vuçiqit, është i errët dhe i dyshimtë. Në shumë raste, ai është parë nën shoqërinë e kriminelëve të dyshuar në Serbi. Por në Kosovë, Danilo mbahet mend për një vizitë të çuditshme në Graçanicë. Danilo erdhi nga Serbia në Kosovë në ditën e “Vidovdanit”, një festë nacionalisto-fetare e ortodoksve serbë. Gjatë kësaj vizite, Danilos dhe shpurës së tij i doli punë me Policinë e Kosovës.

Përveç vizitës në Graçanicë, Danilo ka shoqëri me një njeri që kërkohet ndërkombëtarisht nga Kosova. Djali i Vuçiqit u pa nën shoqërinë e Milan Radojiçiqit, ish-nënkryetarit të Listës Serbe që e pranoi se e organizoi sulmin e armatosur në Banjskë të Zveçanit, gjatë vitit të kaluar.

Danilo dhe Radojiçiqi bashkë i takuan serbët që po udhëtonin nga Kosova në drejtim të Beogradit. Ministri Xhelal Sveçla kishte hedhur dyshime se Danilo ishte i perfshirë në sulmin në Banjskë të Zveçanit, ku mbeti i vrarë në krye të detyrës një polic kosovar.

“Në vendin e ngjarjes ku ka ndodhur sulmi, njësitet policore kanë gjetur dokumentin personal dhe veturën e Milorad Jevtic gjë që dëshmon se ai ka qenë në njësitin që kanë sulmuar Policinë e Kosovës. Terroristi Milorad Jevtic njihet si një ndër bashkëpunëtorët më të afërt të Danilo Vuciq, djalit të presidentit serb Aleksandar Vuciq. Nga 5 vizitat e fundit të djalit të Vuciqit në Kosovë, 4 herë ata kanë qenë bashkë në të njejtën veturë.” – kishte theksuar Sveçla, transmeton Nacionale.

Për lidhjet e Danilos me njerëz të dyshimtë kishte raportuar edhe “Neë York Times” në një artikull të gjatë. Ndërsa medium i njohur hulumtues serb “KRIK” ka raportuar disa herë për lidhjet e Danilos me botën e krimit, posaçërisht me grupin “Janjiqar”, që dyshohet për shumë krime, përfshirë demolimin e klubit të natësn “Komitet”.

I njëjti medium, pra KRIK, kishte publikuar një fotografi dhe një shkrim të gjatë, ku shihej Danilo nën shoqërinë e Aleksandar Vidojeviq, një hooligan i afërt me klanin e Kavaqëve,i cili takim kishte ndodhur në prani të një zyrtari polic.

Së fundmi, Danilo u pa edhe një ditën anti-kushtetuese të Republikës Serbe në Bosnjë dhe Hercegovinë, e cila festë u kritikua gjerësisht nga bota perëndimore. Në festën e Mirolad Dodikut, lider ekstremist i Republikës Serbe, mori pjesë edhe baba i Danilos, Vuçiqi, dhe djali i Ratko Mlladiqit, kriminel i dënuar nga Tribunali i Hagës për krime lufte në ish-Jugosllavi.

Rruga Press