Mesazhi për Kurban Bajramin, të rinjve u bëhet apel që të mos ikin nga Shqipëria

Besimtarët myslimanë kanë falur këtë mëngjes Kurban Bajramin në sheshet qendrore dhe xhamitë në Shqipëri.

Nga sheshi “Skënderbej” në Tiranë, kreu i Komunitetit Mysliman të Shqipërisë, Bujar Spahiu ka uruar festën e Kurban Bajramit . Ai ka bërë një apel edhe për rininë shqiptare.

Spahiu i ka kërkuar të rinjve shqiptarë mos të largohen nga Shqipëria dhe të ndërtojnë të ardhmen e tyre në vendin e tyre, ndërsa i ka këshilluar të qëndrojnë larg tundimeve të kota.

“Gëzuar e për shumë vite festen e Kurban Bajramit kushdo qe e feston! Vetëm te mira paçi gjithmonë bashkë me njerëzit e tu të zemrës! Kjo ditë është dita kur duhet të jemi të njerëzishëm me njëri-tjetrin. Zbutni zemrat me njëri-tjetrin, ruani veten nga ligësitë dhe padrejtësitë, mos u bëni lakmitarë”, tha ai.

Spahiu apeloi që të rinjtë ta projektojnë të ardhmen e tyre në atdhe.

“Pajisuni me moral të bukur. Kthejini sytë nga Zoti, rrini larg tundimeve të kota. Mos ikni nga vendi. Projektoni të ardhmen këtu, në vendin tuaj. T’i shpëtojmë individualizmit të kohës. Të bëhemi altruistë. Të sakrifikojmë nga e mira individuale për të mirën e përbashkët”, tha kreu i KMSH-së.

Rruga Press