Media iraniane ilustron një sulm me raketa në Manëz të Durrësit

Fars News, një e përditshme iraniane e lidhur me Gardën Revolucionare, ka publikuar një artikull ku shfaqet kampi iranian në Manëz, i sulmuar me raketa. Me foto sulmi ilustruese, artikulli justifikon Iranin se një sulm i mundshëm në këtë kamp nuk ka asnjë pengesë ligjore. Sipas artikullit, Irani mund të sulmojë për të mbrojtur sigurinë e tij

Në Iran, media e lidhur me Gardën Revolucionare ka ilustruar një sulm të mundshëm në kampin e muxhahedinëve në Manëz të Durrësit duke përdorur raketa balistike dhe dronë.

Në artikullin e Fars News përshkruhet historia, sipas tyre, terroriste e muxhahedinëve, dhe thuhet se një sulm i tillë do të ishte i justifikuar pasi Irani ka të drejtë të vetëmbrohet dhe të sigurojë paqen në botë.

“Aftësitë e dronëve sulmues dhe raketave balistike të Iranit mund të përdoren për të goditur qendrën e [Mek] në Shqipëri pa asnjë pengesë ligjore”, thuhet në artikullin në fjalë.

Artikulli shton se autoritetet në Teheran duhet të paralajmërojnë qeverinë në Tiranë për kryerjen e veprimeve ushtarake.

“Nëse qeveritë pritëse refuzojnë të dëbojnë dhe ekstradojnë hipokritët (një term i përdorur nga Teherani për muxhahedinët), ata duhet të kërcënohen me veprime reciproke… bazuar në doktrinën e Republikës Islamike për të luftuar kërcënimet e sigurisë në burimin e tyre”, shkruhet më tej në artikull.

Artikulli shoqërohet edhe me një fotografi ilustruese të kampit të muxhahedinëve në Manëz, ndërsa në qiell duken disa raketa që bien në drejtim të tij.

Pak ditë më parë u njoftua anulimi i mbajtjes së eventit të muxhahedinëve në Tiranë, për shkak të rreziqeve nga një sulm terrorist i planifikuar kundër tyre./syri.net

Rruga Press