Maqedonci flet për mundësitë e blerjes së armatimit dhe bashkëpunimin me amerikanët
Në “FIVE” të Dukagjinit, ministri i Mbrojtjes, Ejup Maqedonci, ka theksuar se ka diskutuar mundësitë e blerjes së armatimit nga Forca e Sigurisë së Kosovës. Ai ka shtuar se gjatë qëndrimit të tij në SHBA, ka marrë mbështetje dhe konfirmim se Shtetet e Bashkuara do të jenë në krah të Forcës së Sigurisë së Kosovës, duke vazhduar mbështetjen në aspektin e aktiviteteve të përbashkëta dhe blerjeve ushtarake
Ministri i Mbrojtës, Ejup Maqedonci, gjatë ditëve të fundit ka vizituar Shtetet e Bashkuara të Amerikës, ku ndër të tjera gjatë qëndrimit atje ka takuar zyrtarë nga Departamenti Amerikan i Shtetit dhe Departamenti Amerikan i Mbrojtjes.
E pas kësaj vizite Maqedonci në “FIVE” të Dukagjinit ka treguar për takimet dhe diskutimet, gjatë vizitës atje.
Maqedonci ka theksuar se me ushtruesin e detyrës së Ndihmës Sekretarit të Ushtrisë, Douglas Bush, ka biseduar edhe për mundësit e bashkëpunim mes Forcës së Sigurisë së Kosovës dhe ushtrisë amerikane.
Gjersa po fliste për mundësitë e blerjes së armatimit nga FSK-ja Maqedonci ka theksuar se gjatë qëndrimit të tij, në tokën amerikane, ka marrë mbështetje se ShBA-të do të jenë në krahë të FSK-së.
“Po, do të vazhdojë mbështetja. Unë kam marrë një konfirmim për thellim të raporteve në këtë aspekt. Si në aspektin e aktiviteteve të përbashkëta, ashtu edhe në aspektin e blerjeve ushtarake. Në këtë aspekt kam pasur një takim me Douglas Bush, i cili është ndihmës sekretar i ushtrisë për blerjet, teknologjinë dhe logjistikën, me të cilin kemi diskutuar çështjet e mundësive që në të ardhmen të vazhdojmë blerjet sipas programit të FM-së, i cili është program shtetëror, me të cilin Qeveria e Kosovës prokuron nga SHBA-ja. Edhe në këtë aspekt kam marrë një garanci që SHBA-ja do të jetë në krahët e Forcës së Sigurisë përgjatë zhvillimit e saj, në përputhje me planin gjithëpërfshirës të tranzicionit, plan i cili është hartuar dhe ndiqet bashkërisht nga Ministria e Mbrojtës, FSK-ja dhe SHBA-ja”, ka thënë Maqedonci.
Rruga Press