Macron: Evropa përballet me kërcënimin më të madh që nga Lufta e Dytë Botërore

Presidenti francez Emmanuel Macron ka paralajmëruar se Evropa ndodhet përballë kërcënimit më serioz të sigurisë që nga fundi i Luftës së Dytë Botërore. Në një intervistë për mediat gjermane, Macron theksoi se kontinenti nuk është më i paprekshëm dhe se paqja nuk është më e garantuar.

“Po përballemi me një realitet të ri gjeopolitik. Kërcënimi që vjen nga agresioni rus ndaj Ukrainës është i drejtpërdrejtë dhe afatgjatë për të gjithë Evropën,” deklaroi Macron.

Ai kërkoi rritje të investimeve në mbrojtje dhe një bashkëpunim më të ngushtë mes vendeve anëtare të Bashkimit Evropian dhe NATO-s, duke theksuar se siguria nuk mund të mbështetet më vetëm në garancitë amerikane.

Këto komente vijnë në prag të samitit të NATO-s në Uashington, ku lidershipi evropian pritet të diskutojë për sfidat e reja të sigurisë dhe nevojën për një strategji të bashkërenduar përballë rrezikut rus.

Rruga Press