Lituania bën thirrje për trupat amerikane në mënyrë që të rritet siguria e shteteve baltike

Presidenti i Lituanisë bëri thirrje të shtunën që siguria e shteteve baltike të rritet me trupa amerikane, ndërsa rajoni shqetësohet për grumbullimin e trupave ruse pranë Ukrainës, në atë që vendet perëndimore e shohin si një kërcënim pushtimi.

“Ngritja ushtarake ruse në kufirin lindor të NATO-s po ndryshon situatën e sigurisë,” tha presidenti Gitanas Nauseda në një deklaratë pas takimit me Sekretarin e Mbrojtjes të SHBA Lloyd Austin në Vilnius.

“Është jashtëzakonisht e rëndësishme të forcohet siguria rajonale (shtetet baltike) me trupa shtesë nga Shtetet e Bashkuara dhe të përshpejtohet bashkëpunimi në prokurimet ushtarake,” shtoi ai.

Që nga viti 2019, Shtetet e Bashkuara kanë dislokuar grupe rrotulluese prej rreth 500 trupash dhe pajisjesh në Lituani, dhe në deklaratën e tij Nauseda i bëri thirrje Uashingtonit që ta bëjë këtë një dislokim të përhershëm.

Nauseda tha më herët se Lituania ka frikë se Evropa është “në prag të luftës”.

Presidenti i SHBA Joe Biden tha të premten se ishte i bindur se presidenti Vladimir Putin ka marrë vendimin për të pushtuar Ukrainën.

Austin lavdëroi Lituaninë për qëndrimin ndaj presionit që po bën Rusia, ngritja ushtarake e së cilës ka përfshirë dërgimin e dhjetëra mijëra trupave në Bjellorusi – Lituaninë fqinje – për stërvitjet e përbashkëta që do të përfundojnë të dielën.

Kryeministrja e Lituanisë Ingrida Simonyte tha se vendi i saj beson se trupat ruse në Bjellorusi mund të qëndrojnë atje për një periudhë të gjatë.

“Mund të themi me siguri të madhe se nuk do të shohim tërheqjen e shpejtë të trupave ruse- u tha ajo gazetarëve.

Presidenti i Bjellorusisë Alexander Lukashenko u takua me Putin të premten, duke thënë paraprakisht se ushtarët mund të qëndrojnë për aq kohë sa të jetë e nevojshme.

Simonyte tha se nëse trupat ruse qëndrojnë, kjo mund të ushtrojë presion mbi lidhjen e vetme tokësore të Balltikut me pjesën tjetër të Bashkimit Evropian, një rrip i ngushtë toke midis Bjellorusisë dhe enklavës ruse të Kaliningradit, i njohur si korridori Suwalki.

“Ky do të ishte një ndryshim i madh në situatën e sigurisë. Ne do të duhet të përshtatemi në përputhje me rrethanat në mënyrë që korridori Suwalki dhe shtetet baltike të mbrohen,” tha ajo.

Austin vuri në dukje gjithashtu presionin mbi Vilnius nga Kina, e cila po frenon tregtinë me shtetin baltik për ta ndëshkuar atë për njohjen e Tajvanit të vetëqeverisur.

“E di që po e vizitoj në një kohë kur Lituania është nën presion të jashtëzakonshëm nga të gjitha anët”, tha Austin për Nauseda.

© Rruga Press