Lirohet nga burgu lehona në Shkodër, u arrestua tetë ditë pas lindjes së fëmijës për një gjobë të papaguar

Gjykata liron nga qelia nenën lehonë, duke vendosur të pezullojë ekzekutimin e dënimit me burg. Diana Kolaveri Hoshi, e arrestuar tetë ditë pas lindjes së një fëmije, nuk do të lërë më të vetëm foshnjën e porsalindur.

Në gjykatë u tha se ajo ishte arrestuar për shkak se zyra e përmbarimit nuk e ka gjetur dhe nuk kishte shlyer gjobën që duhet të paguante.

Për këtë arsye, prokuroria ka vënë në lëvizje gjykatën për të bërë konvertimin e gjobës në burg, vendim që është ekzekutuar më 7 mars.

Avokati i gruas tha para se të merrej vendimi se kërkonte shtyrjen e afatit të ekzekutimit deri sa fëmija të bëhej 1 vjeç, por edhe pezullim të vendimit të dënimit me burg.

Nga ana e saj, Prokuroria deklaroi se nuk ka qenë në dijeni që gruaja ishte me fëmijë të vogël, sepse vendimi i dhënë nga gjykata për dënimin e saj me gjobë ka qenë i vitit 2022, për më tepër që i ishte dhënë në mungesë.

Lehona është shprehur se nuk kishte dijeni për gjobën që do të paguante kundrejt qëndrimit në burg për 50 ditë, pasi kishte braktisur foshnjën.

Diana Hoshi ishte dënuar për braktisjen e fëmijës nga martesa e parë, por bashkëshorti i saj, Naim Bahçja pretendon se është detyruar të largohet pasi ish-bashkëshorti e dhunonte dhe nuk e lejonte të takonte vajzën.

Rruga Press