Kurti uron qytetarët për përfundimin e urës mbi Ibër

Nga ora 9:00 e mëngjesit të sotëm është hapur për qarkullim ura më e re për automjete mbi lumin Ibër, që lidh Mitrovicën e jugut me atë të veriut. Kjo është ura e 36-të e ndërtuar në Kosovë dhe u përurua pas më pak se dy muajsh punime intensive.

Lajmin e bëri të ditur Kryeministri i Kosovës në detyrë, Albin Kurti, përmes një postimi në rrjetet sociale, ku përgëzoi banorët e të dy anëve të Mitrovicës për këtë zhvillim të rëndësishëm infrastrukturor.

“Urime banorëve e qytetarëve të Mitrovicës së jugut dhe Mitrovicës së veriut! Përgëzime kompanisë dhe punëtorëve për angazhimin shembullor,” shkroi Kurti.

Kryeministri njoftoi gjithashtu se punimet për një tjetër urë janë ende në zhvillim, duke treguar përkushtimin e Qeverisë për përmirësimin e infrastrukturës dhe lidhjes ndërmjet komuniteteve.

Kjo urë pritet të lehtësojë qarkullimin dhe të forcojë lidhjet ekonomike e shoqërore mes dy pjesëve të qytetit të ndarë për vite me radhë.