Kurti: Përgatitjet për vizitën në Mbretërinë e Bashkuar dhe në Irlandë ishin bërë vitin e kaluar, prandaj e kisha të pamundur të merrja pjesë në Samitin e Tiranës

Kryeministri i Kosovës, Albin Kurti, përmes një postimi në Facebook, ka treguar pse nuk ka marrë pjesë fizikisht sot në Samitin e Tiranës. Sipas tij, përgatitjet për vizitat në Mbretërinë e Bashkuar dhe në Irlandë ishin bërë në vitin e kaluar dhe për këtë arsye e kishte të pamundur të merrte pjesë në takimin e radhës të liderëve të Ballkanit Perëndimor Gjashtë që u mbajt në Tiranë.

Ndërsa ka bërë të ditur se ishte pjesëmarrës virtualisht përmes një videomesazhi ku theksoi mbështetjen dhe solidaritetin e Republikës së Kosovës me Ukrainën dhe popullin e saj.

“Përgatitjet dhe dakordimi për vizitën në Mbretërinë e Bashkuar dhe Irlandë ishin bërë në vitin e kaluar dhe për këtë arsye e kisha të pamundur të merrja pjesë në takimin e radhës të liderëve të Ballkanit Perëndimor Gjashtë (BP6), në Tiranë.

Megjithëkëtë, në konferencën e sotme në Tiranë me titull “Plani i Rritjes dhe Konvergjenca”, isha pjesëmarrës virtualisht përmes një videomesazhi ku theksova mbështetjen dhe solidaritetin e Republikës së Kosovës me Ukrainën dhe popullin e saj; bashkëpunimin dhe integrimin Rajonal përmes Procesit të Berlinit bazuar në rregullat dhe vlerat e BE-së; përkrahjen dhe përkushtimin për Planin e Rritjes të Bashkimit Evropian që mundëson lidhjen graduale me Tregun Unik të BE-së; përkushtimin në reforma dhe pritjet për samitin e radhës të Procesit të Berlinit dhe Planin e Ri të Veprimit të Tregut të Përbashkët Rajonal (TPR)”, ka shkruar Kurti.

Rruga Press