Kurti: Po ecim drejt realizimit të lidhjes hekurudhore Durrës-Prishtinë

Kryeministri i Kosovës Albin Kurti, ka thënë se janë miratuar vendimet për dy marrëveshje, dy projekte madhore zhvillimore në mbledhjen e Qeverisë të mbajtur të mërkurën.

Ai ka thënë se për njërën do të kërkohet ratifikimi në Kuvend, për tjetrën autorizimi i Presidentes për nënshkrimin e të njëjtës.

“Pas mbledhjes së përbashkët të dy Qeverive Kosovë-Shqipëri, me hapa të sigurt po ecim drejt realizimit të lidhjes hekurudhore Durrës-Prishtinë. Me ratifikim në Kuvend, do të përcaktohet procedura, do të ndahet kostoja, në mënyrë që hekurudha të realizohet”, ka shkruar ai.

Ndërkaq, sipas tij, pas negociatave të suksesshme të Qeverisë së Kosovës me Korporatën e Sfidave të Mijëvjeçarit (MCC), do të kërkohet autorizimi nga presidentja Vjosa Osmani, për nënshkrimin e marrëveshjes së bashkëfinancimit në vlerë prej 236.7 milionë dollarë, për siç thotë ai, investimin më të madh ndonjëherë në fushën e energjisë.

Rruga Press