Kurti: Jam i gatshëm të heq masën e reciprocitetit nëse Serbia do të bëj të njejtën gjë

Kryeministri i Kosovës Albin Kurti është treguar i gatshëm të heqë masën e reciprocitetit për targat, nëse Serbia do të bëjë të njejtën gjë. Gjatë një konference, pas përfundimit të mbledhjes së qeverisë, Kurti u shpreh se është i lumtur që masa e reciprocitetit u vendos në Kosovë.

“Në Kosovë nga data 20 shtator ka filluar se zbatuari vendimi i ri për pajisjen me targa të përkohshme për automjetet e Serbisë që hyjnë në Kosovë nga të gjitha pikat kufitare. Vendimi poashtu është duke u zbatuar edhe për sa i përket eliminimit të të gjitha targave ilegale që kanë qarkulluar në Kosovë që nga paslufta. Jam i lumtur që ky problem i dekadave po merr epilogun e merituar. Jam i lumtur poashtu që shoh përgjigjen pozitive të qytetarëve tanë, serbë lokal të të gjitha komunave të Kosovës për t’u pajisur me targa të përkohshme, teksa Qendrat për Regjistrimin e Automjeteve po punojnë me kapacitete të plota”, ka thënë Kurti.

Kurti gjithashtu u bëri thirrje kryetarëve të Komunave në veri, në mënyrë që të tërheqin kamionët, më të cilët qytetarët serb po bllokojnë rrugët.

“Jam i njoftuar që pengesat që shpijnë tek rrugët kufitare janë duke u bërë me disa kamionë që janë pronë e institucioneve komunale dhe kjo sigurisht që përbën shkelje dhe keqpërdorim të pronës publike. U bëjë thirrje kryetarëve të komunave në veri që të tërheqin automjetet e institucioneve komunale nga rruga dhe ftojë poashtu edhe grupin e organizuar të qytetarëve serbë që të largohen nga dy rrugët regjionale sepse kësisoj ata e kanë bllokuar edhe rrugën e tyre”, deklaroi ai.

Kurti tha se është në interes të të gjithëve vendosja e ligjshmërisë, ndërkohë që shtoi se ky veprim nuk ka qenë kundër qytetarëve serb, por një mënyrë që dy vendet të jenë të barabarta.

“Vënia e ligjshmërisë në vend është interes i të gjithëve prandaj unë jam i bindur që me kalimin e kohës këtë po e kuptojnë të gjithë. Nuk është as vendim e as nuk janë këto masa kundër dikujt, ose për ta diskriminuara dikë. Përkundrazi janë për të gjithë, për trajtim të barabartë. E kam thënë se vendimi për targat të përkohshme nuk u drejtohet qytetareve serbë të Kosovës dhe se ata e kanë të drejtën e plotë të pajisen me targa të përhershme të Kosovës”, tha ai.

Kurti në fund të fjalës së tij tha foli edhe për takimin me ambasadorët e QUINT-it dhe me shefin e BE-së në Kosovë. Ai tha se është i gatshëm që të tërhiqet nga zbatimi i kësaj mase në rast se edhe Serbia e bënë një gjë të tillë ndaj Kosovës.

“Kjo masë është e barabartë me atë që shteti i Serbisë e aplikon ndaj Kosovës për dy dekada. E kam bërë të ditur edhe në takimin që e kam pasur dje me ambasadorët e QUINT-it dhe me shefin e misionit të BE-së, se vendimi i Kosovës është në kornizën e zbatimit të ligjit dhe jam i gatshëm që në çdo kohë këtë masë ta heqë, nëse kemi një zotim të tillë edhe nga pala e Serbisë”, ka thënë Kurti.

Rruga Press