Kurti i indinjuar me Prokurorinë: Arrestimi i Krasniqit tani qe KEK-u del me fitim
Kryeministri i Kosovës, Albin Kurti, në seancën e së enjtes në Kuvend e ka shprehur indinjatën ndsj Prokurorinë, pas arrestimit të drejtorit të KEK-ut, Nagip Krasniqi. Kurti është shprehur i bindur se në Prokurori ekziston një disponim negativ karshi Qeverisë së udhëhequr prej tij.
Ai ka thënë se më këtë çështje do të merret drejtësia. Kurti ka theksuar se arrestimi i Krasniqit e ka gëzuar opozitën, por se kjo sipas tij nuk përben fakt të kësaj çështjeje.
“Është e vërtetë që dje u arrestua kryeshefi i KEK-ut, Nagip Krasniqi, tash ai është në ndalim 48 orë dhe është sistemi i drejtësisë i cili merret me çështjen e tij. Kjo çështje ka fakte dhe ne urojmë e shpresojmë që këto fakte të merren me profesionalizëm. Është fakt që pati një gëzim opozitar, por ky është fakt i opozitës jo i çështjes”, ka theksuar Kurti.
Ai e ka akuzuar Prokurorinë se nuk ka hetuar keqpërdorimet, që sipas tij, janë bërë në të kaluarën në KEK.
“E dimë që ka pasur shumë kryeshefa në KEK në të kaluarën dhe keqpërdorime marramendëse, por asnjëherë nuk janë hetuar nga prokuroria. Prokuroria është e zellshme në këtë rast, kur fitimi i KEK-ut më 2022 ka qenë 107 milionë euro. Zelli i prokurorisë për t’u marrë me deponimet, e faktet, e dëshmitë e keqpërdorimeve të mëhershme është zero, ndërkaq zelli për t’u marrë me kryeshefin i cili solli 107 milionë euro fitim ishte maksimal”, ka theksuar Kurti.
Ai është shprehur i bindur që në Prokurori ekziston një disponim politik negativ karshi qeverisë së tij.
Kjo sipas tij lidhet më kryeprokurorin e Prokurorisë Speciale, Blerim Isufaj.
“Unë nuk kam dyshim që në Prokurorinë e shtetit ekziston një disponim politik negativ ndaj qeverisjes sonë, ndaj pushtetit të ri të dalë nga zgjedhjet e shkurtit. Kjo lidhet më shumë se me askë tjetër me figurën e Blerim Isufaj. Bëhet fjalë për një prokuror që është i mirënjohur që rastin e vrasjes së Dino Asanj e kategorizoi me vetëvrasje ndërsa vetëvrasjen e Hamdi Sopës e shndërroi në vrasje. Njihet si kryeprokuror që asnjë rast nuk e ka të fituar në gjykata dhe pikërisht ky prokuror do të bëhet kryeprokuror, përkundër vullnetit të presidentes, kryeministrit dhe kryeparlamentarit. Është siklet i madh për tre krerët e shtetit kur drejtësia lëngon pikërisht për shkak se kemi një prokurori që nganjëherë nuk do e nganjëherë nuk din, e shpesh të dyja”, ka theksuar Kurti.
Gjithashtu, deputetët e VV-së Halil Thaçi, Arbër Rexhaj, Artan Abrashi e Adnan Rrustemi, kanë drejtuar gishtin drejt Prokurorisë, duke thënë se kjo është hakmarrje e Blerim Isufajt që nuk po bëhet Kryeprokuror.
Rruga Press