Kurti: Asociacioni nuk do të kalojë në qeveri

Kryeministri i Kosovës, Albin Kurti deklaroi se Asociacioni i komunave me shumicë serbe ka kaluar në Kuvend, por nuk ka kaluar në Gjykatën Kushtetuese, në popull e as në qeveri.

Gjatë fjalës së tij ditën e djeshme në seancën në Kuvend, Kurti u shpreh se Beogradi, që nga vjeshta e vitit të kaluar ka insistuar që marrëveshja të bëhet pasi të zbatohet Asociacioni.

Por sipas tij, kjo nuk u bë dhe është fitore për Kosovën.

“Zajednica ka kaluar këtu në kuvend, Zajednica nuk ka kaluar në Gjykatë, nuk ka kaluar as në popull e nuk kalon as në kryeministri e qeveri, por tek ju ka kaluar. Insistimi i Beogradit është të bëjmë marrëveshje pasi të zbatojmë Asociacionin dhe kjo nuk u bë. Kjo është fitore e jona, nuk është e imja, por e Kosovës dhe qëndrueshmërisë së saj”, theksoi ai.

Ndër të tjera, Kurti tregoi se cila është marrëveshja më me rëndësi për të në raport me Serbinë.

“E kam listën prej 2 korrikut të vitit 2011 deri më 25 gusht 2015, të gjitha marrëveshjet që janë 20 dhe nëse i marrim dakordësimet janë 39 për katër vjet, Asociacioni është ose e 9-ta ose 16-ta dhe marrëveshja për të cilën unë jam i interesuar është kjo për librat kadastral që është marrëveshja e 5 nëse janë 20 dhe e 8-ta nëse janë 39. Pasi Serbia i ka origjinalin dhe as kopjen nuk na e jep”, u shpreh kreu i qeverisë së Kosovës.

Rruga Press