Kurteshi akuza Thaçit dhe Veselit për urdhërimin e vrasjes së Astrit Deharit: Urdhëruan veglat e tyre në Prokurori, Gjykatë, AKI e Polici për ta inskenuar rastin
Anëtari i Lëvizjes VETËVENDOSJE!-es, Sami Kurteshi, ka akuzuar ish-presidentin Hashim Thaçi dhe ish-kryekuvendarin Kadri Veseli, se kanë dhënë urdhër “për vrasje” të Astrit Deharit.
Në konferencën e mbajtur para Prokurorisë Speciale lidhur me rastin e Deharit, Kurteshi i ka cilësuar Thaçin e Veselin si “majë të shtetit” që sipas tij, e kanë pranuar se Dehari është vrarë.
Kurteshi ka thënë se të përfshirë në “inskenim” kanë qenë edhe Policia, Prokuroria dhe AKI-ja.
“Urdhri ‘për vrasje’ ka qenë politik nga maja e shtetit, fatkeqësisht në atë kohë nga presidenti i vendit dhe kryekuvendari që edhe në mjete të informimit kanë pranuar se është vrasje rasti i Deharit dhe ata kanë dhënë urdhër të drejtpërdrejt për veglat e tyre në Prokurori, Gjykatë, AKI e Polici për ta inskenuar rastin”, ka thënë ai.
Sipas tij, pesë prokurorë që janë marrë me rastin kanë qenë në prag të pensionit.
Kurteshi ka thënë se kjo është përdorur si strategji e Prokurorisë që rasti të zvarritet.
“Rastin e kishte prokurori Metush Biraj. Ky prokuror vetëm ka nënshkruar sepse rolin kryesor e ka luajtur kryeprokurori i Prokurorisë Themelore, Sylë Hoxha, që më vonë për këtë punë është dekoruar si prokuror i Prokurorisë Speciale. Sot është i pensionuar dhe punon avokat në Prizren. Po ashtu edhe Metush Biraj. Prokuroria ka dërguar dëshmi të manipuluara në Lozanë (Institutin e mjekësisë ligjore në Zvicër).. Ka dërguar zarfe të zbrazëta. Ky është prokurori i pestë që pensionohet dhe nuk e ka përfunduar rastin. Nuk mund të fshihet një krim i vrasjes duke shkuar në pension dhe duke i lënë punët në gjysmë. Afrim Shefkiu për rreth 3 vjet e gjysmë nuk ka bërë asgjë pos që e ka marrë në pyetje rreth 2-3 herë Albulena Haxhiun për postimet në Facebook. Nuk ka dhënë asnjë urdhër për hetim të urdhërdhënësve për vrasjen e Astrit Deharit. Strategjia e prokurorisë: zvarritja e rastit, bartja e rastit te prokurorët parapensionistë që dorëzojnë stafetën e krimit nga njëri te tjetri. Rasti nuk mund të zvarritet në përjetësi, do të zbardhet”, është shprehur ai.
Rruga Press