Kryeministri polak “kërcënon” Ukrainën

Polonia mund ta zgjasë ndalimin e importit të grurit ukrainas edhe në prodhimet e tjera bujqësore, paralajmëroi kryeministri polak Mateusz Morawiecki.

Ai i bëri thirrje Ukrainës që të ndalojë përshkallëzimin e tensioneve të shkaktuara nga mosmarrëveshja për importin e grurit ukrainas, njoftoi televizioni polak Polsat.

Embargoja e importit të grurit ukrainas në Poloni, Sllovaki, Hungari, Rumani dhe Bullgari u lejua nga Komisioni Evropian të zbatohej këtë vit në maj dhe ndalimi përfundoi të premten e kaluar.

Sidoqoftë, Varshava refuzoi të heqë kufizimet. Ky veprim u kritikua ashpër nga Kievi, i cili gjithashtu deklaroi se kishte paraqitur një ankesë në Organizatën Botërore të Tregtisë (OBT) kundër Polonisë, si dhe Sllovakisë dhe Hungarisë.

“Unë po paralajmëroj autoritetet ukrainase, sepse nëse ata e përshkallëzojnë konfliktin në këtë mënyrë, ne do të shtojmë produkte të tjera në ndalimin e importeve në Poloni”, ka thënë Morawiecki. Siç raportohet nga Polsat TV, ai i referohej paralajmërimit të Kievit se Ukraina mund të hakmerret duke ndaluar importin e perimeve dhe frutave nga Polonia.

“Ne kemi bërë shumë për Ukrainën dhe prandaj presim që ajo t’u qaset interesave tona me mirëkuptim”, ka shtuar Morawiecki.

Polonia është një nga mbështetësit më të mëdhenj të Ukrainës, e cila i ka rezistuar pushtimit rus për më shumë se një vit e gjysmë. Ajo justifikon embargon duke u përpjekur të mbrojë fermerët e vet, të cilët, sipas Varshavës, do të duhej të konkurronin me prodhimin më të lirë nga Ukraina.

Rruga Press