Kryeministri në ardhje i Serbisë: Do të mbajmë miqësinë me Kinën e Rusinë, nuk vendosim sanksione për luftën ruse në Ukrainë

Mandatari për formimin e qeverisë serbe, Millosh Vuçeviq, gjatë fjalimit të tij në Kuvendin e Serbisë deklaroi se Serbia do të vazhdojë të mbajë lidhjet me Rusinë dhe Kinën. 

“Serbia nuk mund dhe nuk do të heqë dorë nga miqësia me Rusinë, popullin e së cilës ne e konsiderojmë vëllazëror”, tha ai.

Ai tha se Serbia nuk do t’i bashkohet sanksioneve kundër Rusisë.

Ndërsa foli edhe për rëndësinë e partneritetit me Kinën, për tëcilën tha se marrëveshja tregtare do të hapë dyert e tregut kinez për biznesmenët.

“Pavarësisht pikëpamjeve kontradiktore të shumë njerëzve në Perëndim, për ne Kina përfaqëson një vend mik, një partner dhe një aleat të besueshëm në mbrojtjen e integritetit tonë territorial”, tha Vuçeviq në Kuvendin serb.

Ai tha se qëndrimi i Serbisë ndaj Kinës nuk do të ndryshojë dhe shtoi se mezi pret vizitën e presidentit kinez, Xi Jinping, i cili do ta vizitojë Serbinë më 7 dhe 8 maj.

Për Bashkimin Evropian ai tha se Serbia ende e konsideron si synim strategjik, duke shtuar se nuk do t’i pranojnë kriteret e tij për Kosovën dhe sanksionimin e Rusisë.

“Pritshmëritë e BE-së lidhen me atë që Serbia ta poshtërojë veten duke njohur pavarësinë e Kosovës dhe t’i bashkohet sanksioneve kundër Rusisë për shkak të pushtimit të Ukrainës”, ka thënë ai.

Millosh Vuçeqviq përsëriti qëndrimin e Aleksandar Vuçiqit kundër anëtarësimit të Kosovës në Këshill të Evropës duke shkelur kështu Marrëveshjen Bazike me Kosovën të ndërmjetësuar nga Bashkimi Evropian.

Qeveria e re do të ketë 25 ministri dhe pesë ministra pa portofol. Ish-kreu i shërbimit të inteligjencës Aleksandar Vulin, i cili është nën sanksionet e Shteteve të Bashkuara të Amerikës që nga korriku i vitit 2023 – ndër të tjera për shkak të lidhjeve me Rusinë – është propozuar të rikthehet në kabinet si zëvendëskryeministër.

Një zyrtar tjetër nga “lista e zezë” e SHBA-së për shkak të lidhjeve me Rusinë po kthehet në Qeveri – Nenad Popoviç, si ministër pa portofol. /TheGeopost/

Rruga Press