Kryeministri Kurti: Sulmi terrorist ishte plan për aneksimin e veriut të Kosovës

Kryeministri Albin Kurti ka thënë se bazuar në të gjetjet e Policisë së Kosovës, sulmi terrorist serb ishte pjesë e planit për aneksimin e veriut.

Ai ka shkruar në rrjetin social X të hënën se sulmi në fshatin Banjskë të Zveçanit ishte koordinuar në 37 pozicione të dallueshme, e sipas tij, do të pasonte krijimi i një korridori për të mundësuar furnizimin me armë e trupa.

“Në bazë të dokumentacionit të konfiskuar, Policia e Kosovës ka konfirmuar se sulmi terrorist ishte pjesë e një plani më të madh për të aneksuar veriun e Kosovës, nëpërmjet një sulmi të koordinuar në 37 pozicione të dallueshme. Do të pasonte krijimi i një korridori për në Serbi, për të mundësuar furnizimin me armë dhe me trupa”, ka deklaruar kryeministri Kurti.

Të dielën kur u bë një javë nga sulmet serbe në Banjskë, Kurti ka shkruar se sulmet ishin të orkestruara nga shteti i Serbisë.

“Ka kaluar një javë nga sulmet tragjike terroriste të orkestruara nga Serbia. Gjatë 7 ditëve të fundit kemi qenë dëshmitarë të dhunës, kërcënimeve dhe glorifikimit të akteve të tilla. Gjatë kësaj kohe, ne vlerësojmë thellësisht mbështetjen e aleatëve tanë në luftën tonë kolektive për demokraci”, ka thënë ai.

Në këtë sulm të armatosur kishte mbetur i vrarë rreshteri Afrim Bunjaku e ishin plagosur disa zyrtarë të tjerë policorë, ndërsa janë vrarë të paktën tre serbë të armatosur.

Based on confiscated documentation, @Kosovo_Police have confirmed that the terrorist attack was part of a larger plan to annex the north of Kosova via a coordinated attack on 37 distinct positions. Establishing a corridor to Serbia would follow, to enable supply of arms & troops.

— Albin Kurti (@albinkurti) October 2, 2023

Rruga Press