Kronologjia datë pas date/ Si u rekrutua McGonigal për të goditur PD-në
Njolla më e errët, nga skandali shumëplanësh i rekrutimit të një agjenti të FBI-së, për ta përdorur për interesat politike të qeverisë shqiptare, është padyshim ajo e bashkëpunimit me të për të minuar demokracinë dhe goditur opozitën. Meqë për këtë temë ka pasur debate të forta, akuza të pareshtura nga PD-ja dhe mohim kategorik nga qeveria, Lapsi.al i është kthyer edhe njëherë dokumenteve kryesorë për të bërë zbardhjen e plotë të përfshirjes së Charles McGonigal në këtë mision.
Për të qenë farmaceutikisht të paanshëm jemi mbështetur thelbësisht në katër burime. Së pari tek aktakuza e prokurorëve amerikanë kundër agjentit të FBI-së, së dyti tek interpretimin që saj i është bërë nga dy media prestigjoze si “New York Times” dhe “CNN” e së treti nga dëshmia që ka dhënë ish e dashura e tij e tradhëtuar.
Le ta themi që në fillim, ky artikull mbështetet në hipotezën që ngre dhe “New York Times” se Mcgonigal u vu në në shërbim të Edi Ramës: “Ndërsa ishte ende në FBI, ai krijoi një marrëdhënie me kryeministrin e Shqipërisë Edi Rama dhe sipas prokurorëve të Uashingtonit ndërmori hapa që ishin në dobi të këtij politikani”.
Po si u zhvillua ngjarja?
Jemi në parag të zgjedhjeve parlamentare të 25 qershorit 2017 dhe ashtu sikurse ndodh gjithmonë me partitë shqiptare, PD e Lulzim Bashës bëri një kontratë lobimi me një kompani amerikane të drejtuar nga Nik Muzin. Në këmbim të një pagese me prejardhje të errët prej 675 mijë USD, ish kreu demokrat përfitoi një foto me presidentin Donald Trump për ta përdorur për fushatë, disa intervista dhe takime përtej oqeanit. Për momentin historia u mbyll me kaq. Të gjithë e dininin se këto ishin arritur përmes parave, por përderisa PD-i humbi zgjedhjet zhurma u shua. Së paku për publikun, por siç do të shohim më vonë, aspak për Edi Ramën.
Ky i fundit megjithëse kishte një marëveshje bashkëqeverisje me Lulzim Bashën (koalicioni PD-PS vazhdoi edhe pas zgjedhjeve deri sa u formua qeveria e re në shtator 2017), nuk i duroi dot akuzat për vjedhjen e zgjedhjeve dhe përbetimin e ish liderit të PD: “Më gënjeve njëherë turp për ty, po ndodhi sërisht, turp për mua”.
Rama mendohet se në verë- vjeshtën e vitit 2017 të ketë nisur projektin e neutralizimit të Bashës.
Pikërisht në këtë kohë, mijra klimetra larg nga këtu, një agjent i FBI-së, tashmë botërisht i njohur si Charles McGonigal, i cili ishte në prag të pensionit dhe nuk priste ti nënshtrohej më testit të poligrafit, i kërkon në gusht të 2017, një të njohuri të tij shqiptar, Agron Nezës, ashtu sikurse tregon aktakuza amerikane, një shumë të madhe parash borxh.
Me siguri që ish agjenti i sigurimit, Neza nuhat rastin e artë se para të zeza mund të bëhen lehtësisht në Ballkan dhe në Shqipëri. “New York Times” e përshkruan kështu këtë moment: “Prokurorët nuk dhanë detaje se si u takuan dy burrat, as nuk e përshkruan marrëdhënien e tyre as nuk zbuluan arsyen e kërkesës. Por në akt-akuzën e Nju Jorkut, zoti Neza përmendet si miku i zotit McGonigal. Në muajt pasi zoti McGonigal kërkoi para, dy burrat bënë udhëtime të shumta në Evropë, ku z. McGonigal me sa duket përdori pozicionin e tij në përpjekje për të ndikuar në biznes për zotin Neza, pretendojnë prokurorët në padinë e Uashingtonit” tregon gazeta.
Një rrugtim i frrytshëm në kërkim të parave mund të qe dhe kontakti me majat e regjimit të korruptuar të Tiranës. Pa kaluar as një muaj nga kërkesa për ti marrë para borxh Agron Nezës, Charles McGonigal, gjendet në zyrën e Edi Ramës.
Ndryshe nga sa ka rrëfyer kryeministri Shqipëtar në qëndrimet që ka mbajtur, nuk ka qenë zyrtari i FBI-së që i ka kërkuar atij një takim përmes sms-ve, por njerëzit e Ramës që tentojnë të fusin në rrjetë njeriun e lartë të sigurisë. Aktakuza e thotë qartë se qe këshilltari informal i Ramës Dorian Duçka ai që rregulloi takimin. “Në shtator 2017, burrat udhëtuan për në Shqipëri, thanë prokurorët, ku z. Neza e prezantoi zotin McGonigal me Dorian Duçkën, një ish-zyrtar shqiptar që shërbente si këshilltar informal i kryeministrit, zotit Rama. Z. Duçka, i përshkruar në akt-akuzën e Uashingtonit si Personi B, e solli zotin McGonigal të takohej me zotin Rama.” shkruan “New York Times”.
Le të jemi të kujdesshëm. Deri këtu nuk duket se ka asnjë shenjë të një projekti për të goditur opozitën. Neza dhe Duçka ndërhyjnë për të ndikuar Edi Ramën për bizneset e tyre. Tendera nafte, shmangje kompanish ruse në favor të atyre kineze etj. Por ajo që bën çudi është fakti se ashtu sikurse shkruan CNN, takimi u mbajt sekret nga palët dhe sidomos nga FBI-a, të cilës McGonigal e kishte për detyrë ti’a tregonte lëvizjet. Ish kolegët e agjentit të FBI-së i thanë CNN se ky duhet cilësuar si një rast korrupsioni, ndërsa vetë metdia prestigjoze shkruan se McGonigal i mori 225 mijë USD-të duke ia mbajtur të fshehta FBI-s, po ashtu siç bëri dhe për marëdhënien me kryeministrin e Shqipërisë.
Me siguri kaq do i ketë mjaftuar Edi Ramës, që si një njohës i mrekullueshëm i dobësive dhe veseve njerëzore, ta arkivonte Charls McGonigalin mes atyre që mund ti përdorte në të ardhmen.
Rasti do të paraqitej shumë shpejt. Por para tij, s’duhet harruar, se vetëm pak javë pasi kishte kërkuar para borxh dhe pasi takoi në shtator Edi Ramën, McGonigal mori 225 mijë USD-të e para nga Agron Neza. Ai ishte futur në thes dhe rasti për ta përdorur do të paraqitej shumë shpejt.
Në 14 nëntor 2017, sipas ligjeve amerikane lobisti Nik Muzin i bëri transparent departamentit të drejtësisë, paratë që kishte marrë në këmbim të shërbimeve që i kishte bërë Bashës dhe PD-së para zgjedhjeve. Këtu makineria e pushtetit në Tiranë nuhati se kishte në dorë një armë të fortë për të përdorur zyrtarin e FBI. Ngjarjet precipituan shpejt. Agjensia BIRN botoi në bazë të të dhënave të Nik Muzinit, një artikull të fortë të gazetarit Besar Likmeta, ku ende nuk përmendej hipoteza për lidhjet ruse, por hidheshin dyshime për burimet e financimit të parave që kishin mbëritur në SHBA.
Po në nëntor 2017, McGonigal rikthehet në Tiranë, takohet me Ramën, i cili me sa duket ia kishte gjetur punën fitimprurëse. Tani agjenti i FBI-së kishte material për ti shërbyer kryeministrit në projektin për të dëmtuar opozitën. Ja seç shkruan New York Times: “Në nëntor, pasi z. McGonigal u takua përsëri me kryeministrin dhe z. Duçka në Shqipëri, ai kontaktoi të njëjtin prokuror që e kishte marrë me vete në Austri (për llogari të Tom Doshit-shënimi i Lapsi.al), për të nisur një hetim të mundshëm ndaj një lobisti, që kundërshtari politik i zotit Rama kishte punësuar për të pasur akses dhe mbështetje tek Presidenti Donald J. Trump”.
Dhe këtu marëdhënia zyrtare mes një shefi qeverie dhe një agjenti të FBI-së, ku njëri kishte interesa politike për të shkatërruar opozitën dhe tjetri për të bërë para…fillon e shndërohet në miqësi. Ish e dashura e tradhëtuar e McGonigalit, Allison Guerreiro, e cila denoncoi në inat e sipër veprimet e tij të dyshimta, e cilësoi këtë si një “miqësi të papërshtatshme” mes kryeministrit dhe burrit me të cilin ndante shtratin. Ajo rrëfeu se ata bisedonin shpesh në celular përmes aplikacionit Viasat, se ai i tregonte foto me Ramën, madje se kishin konsumuar së bashku edhe një darkë në një restorant të shtrenjtë njujorkez.
Nën avujt e verave fine që preferonte Charls McGonigal sipas rrëfimeve të së dashurës, do jetë çuar përpara edhe strategjia e hetimit nga FBI-a të Partisë Demokratike. Ajo që është e sigurtë është se materialet mbërinin nga Tirana, madje drejtpërdrejt nga kryeministria. Edi Rama ka pretenduar në daljet e tij publike se nuk mund ta bënte një gjë të tillë, pasi ai nuk kishte më shumë materiale sesa kishte botuar BIRN. “Po të kisha pasur pse jo do ti’a kisha dhënë FBI-së” tha ai në Euroneës në një përpjekje për ta shfryrë çështjen. Por leximi që New York Times i bën aktakuzës së prokurorëve amerikanë e përgënjeshtron kryeministrin. “Në fillim të vitit 2018, sipas aktakuzës së Uashingtonit zoti Neza vazhdoi t’i transmetonte zotit McGonigal informacione për zotin Muzin – disa prej të cilave erdhën drejtpërdrejt nga zyra e zotit Rama. Z. McGonigal më pas e përcillte informacionin tek të tjerët në zyrën e FBI-së në Nju Jork” nënvizon gazeta.
E pra nuk janë as mediat e kazanit, as kundërshtarët politikë që e shpjegojnë kaq thjeshtë këtë skemë, por një shkrim me katër autorë, dy prej të cilëve me çmime Pulitzer, që zuri një faqe të madhe në një prej gazetave më prestigjoze të botës.
Dhe plani funksionoi. Merita për këtë nuk mund ti mohohet aspak ideusit dhe pagatorit që e bëri atë të mundur. Në shkurt të 2019 FBI hapi zyrtarisht një hetim për lobistin Nik Muzin “me kërkesën e të pandehurit McGonigal dhe me udhëzimin e tij”. New York Times heq çdo dyshim se cilët qenë ata që ishin të interesuar për këtë hetim: “Z. Neza ishte ndër burimet konfidenciale që dhanë informacione gjatë hetimit dhe z. Duçka pagoi dëshmitarët në Evropë për të udhëtuar në një takim me FBI, thuhet në aktakuzë”.
Pra, le ta përmbledhim. Në gusht 2017, McGonigal kërkon borxh, në shtator takon Ramën, menjëherë pas kësaj merr të paktën 225 mijë USD, në nëntor takohen përsëri në Tiranë. Menjëherë fillon dhënia e marerialeve me burim nga kryeministria kundër Bashës dhe PD. Këto materiale që servireshin nga Neza dhe këshilltari informal i kryeministrit, Dorian Duçka, i jepen FBI-së. Duçka paguan edhe dëshmitarët që dëshmojnë për FBI-në lidhur me këtë ngjarje dhe kjo i mbahet e fshehtë institucionit. Në shkurt 2018, hapet hetimi zyrtar për lobistin e Bashës.
Në harkun e gjashtë muajve, falë një lidhje sekrete dhe pagesave nën dorë arrihet gjithçka. Skema ka funksionuar, por ajo nuk përfundon këtu. Sepse qëllimi i saj kryesor është propaganda.
Nuk kalojnë as pak ditë nga hapja e çështjes prej FBI-së, kur në mars 2019, si me magji, revista amerikane “Mother Jones”, publikon investigimin e famshëm lidhur me financimet ruse që ka marrë Basha dhe PD-ja. Kaq shpejt “rrodhën” sekretet e kundërsipiunazhit amerikan në media? A nuk të çon dhe logjika më e dobët të mednosh se edhe këtu kemi një lobim mbi lobimin? pa pasur fakte kjo mbetet vetëm hipotezë, por një nga ato të tilla që janë vështirë të kundërshtohen.
Sepse duhej e gjitha kjo kuptohet lehtë. Hetimi i FBI-së dhe dalja e artikullit për paratë e dyshuara ruse të PD-së nxiti në Tiranës një fortunë mediatike për denigrimin e opozitës, skiciomin e saj si të paguar nga Kremlini dhe në kundërshtim të plotë me vokacionin perendimor të shqiptarëve. Më mirë se kushdo këtë delir propagandistik e sheh të shprehur tek kjo dekratat me tone patetiko qesharake të Elisa Spiropalit, që e publikoi në Facebokkun e tij edhe Edi Rama (video poshte).
Charls McGonigal i kishte hallall paratë sepse ai dhuroi më shumë municion të rëndë sesa duhej për asgjesimin e opozitës. Dhe kjo fabul vazhdoi deri vonë, ambasadorja Kim foli muajt e fundit për financimet Ruse dhe e gjitha do vazhdonte gjatë…
Por, sepse ka gjithmonë një por, fati e deshi që agjenti i cili sipas CNN, u vu në shërbim të politikanit Rama, duke kryer në mënyrë shembullore detyrat që merrte prej tij, të mos ishte edhe si dashnor, në të njëjtën lartësi devotshmërie. Gruaja që ndau dikur shtratin me të, njoftoi FBI-në për paratë kesh dhe lidhjet e tij të papërshtatshme me kryeministrin shqiptar. Dhe kështu një histori pasioni të tradhëtuar u bë sebep që gjysma e votuesve shqiptarë të shpëtonin nga damka e fabrikuar e varësisë nga Kremlini./Lapsi.al
Rruga Press