Kosova e Gjermania nënshkruajnë marrëveshje në fushën e mbrojtjes dhe të sigurisë

Komandanti i FSK-së, gjenerallejtënant Bashkim Jashari dhe shefi i mbrojtjes së Gjermanisë, gjeneral Carsten Breuer nënshkruajnë Marrëveshje në fushën e mbrojtjes dhe të sigurisë.

Sipas njoftimit të FSK-së marrëveshja e nënshkruar siguron përkrahjen e Gjermanisë për Kosovën në ofrimin e mbështetjes politike, ushtarake dhe ligjore për FSK-në në mbështetje të pjesëmarrjes në organizata ndërkombëtare. 

“Marrëveshja gjithashtu detajon fushat e bashkëpunimit në mes të dy forcave të armatosura duke u fokusuar në stërvitje, trajnime, pjesëmarrje në organizata ndërkombëtare, mbështetje teknike dhe logjistike si dhe shumë fusha tjera me interes të përbashkët”, thuhet në njoftim.

Marrëveshja është nënshkruar të martën në kuadër të vizitës zyrtare që Jashari, është duke e zhvilluar në Gjemani. Në njoftimin e FSK-së thuhet se në takim me Breuerin është diskutuar mbi sfidat globale dhe rajonale të sigurisë dhe se të dy gjeneralët kanë theksuar rëndësinë e rritjes së  bashkëpunimit ushtarak ndërmjet forcave të armatosura të dy vendeve.

“Marrëdhëniet e FSK-së me aleatët e saj strategjikë janë tejet të rëndësishme në fuqizimin dhe zhvillimin e saj e në linjë me këtë Gjermania do të vazhdojë të luajë një rol kyç në ngritjen e kapaciteteve të mbrojtjes”, thuhet në njoftim.

Rruga Press