Korea e Veriut lëshon satelitin “spiun”, alarmohen fqinjët

Korea e Veriut njoftoi të mërkurën se kishte lëshuar me sukses në hapësirë një satelit spiun ushtarak, pas dy përpjekjesh të dështuara.

Pamje të raketës që mbante satelitin u publikuan nga agjencia shtetërore e lajmeve. Lideri i vendit të izoluar aziatik, Kim Jong Un është shfaqur i qeshur, duke përshëndetur fotografët.

Korea e Jugut reagoi duke pezulluar një marrëveshje ushtarake të vitit 2018, që synonte uljen e tensioneve në rajon.

Sinkron Heo Tae Keun, zv.ministër i Mbrojtjes, Kore e Jugut:

“Pavarësisht paralajmërimeve tona, Veriu vazhdoi me dërgimin në hapësirë të satelitit spiun. Ky veprim përbën një shkelje të rezolutës së Këshillit të Sigurimit të OKB-së, që i ndalon Koresë së Veriut që të qëllojë raketa balistike dhe të kryejë veprime provokuese që kërcënojnë sigurinë tonë”.

Sikurse Korea e Jugut, edhe Japonia deklaroi se lëshimi i satelitit binte ndesh me rezolutat e OKB-së. Më herët zyra e kryeministrit Fumio Kishida lajmëroi banorët e Okinauas që të strehoheshin në banesa ose bodrume nëntokësore.

Rruga Press