Konjufca priti ambasadorin e Italisë, kërkon mbështetje për integrim

Kryetari i Kuvendit të Kosovës, Glauk Konjufca, ka pritur në takim ambasadorin e Italisë në Kosovë, Antonello De Riu, nga i cili kërkoi që Roma zyrtare të vazhdoj edhe më tej ta mbështesë Kosovën në procesin integrues.

Konjufca vlerësoi marrëdhëniet shumë të mira mes dy vendeve dhe i shprehu mirënjohje ambasadorit De Riu për mbështetjen e vazhdueshme që Italia mike, si një ndër aleatët më të rëndësishëm, i ka dhënë ndër vite Kosovës në proceset e shtetndërtimit, integrimit evropian dhe forcimit të subjektivitetit ndërkombëtar.

Në këtë kontekst, kryeparlamentari vuri në pah nevojën e vazhdimit të mbështetjes për proceset integruese që ka përpara shteti ynë. 

Ambasadori De Riu falënderoi kryetarin Konjufca për pritjen dhe konfirmoi përkrahjen e shtetit italian për Republikën e Kosovës. Po ashtu në takim u ritheksua gatishmëria e dyanshme për thellimin e bashkëpunimit në fusha me interes të përbashkët në mes dy vendeve.

Rruga Press