Komandanti i KFOR-it: Do të veprojmë nëse rrezikohet stabiliteti, siguria dhe liria e lëvizjes

Komandanti i trupave të misionit të NATO-s në Kosovë, KFOR, Angelo Michele Ristuccia, ka thënë se ky mision do të vazhdojë të punojë ngushtë me Bashkimin Evropian dhe të sigurojë kornizën e nevojshme të sigurisë që dialogu Kosovë-Serbi të ecë përpara.

Në një adresim për media nga selia e NATO-s në Bruksel, ku është takuar me Zëvendës Sekretarin e Përgjithshëm të NATO-s, Mircea Geinana, ai ka thënë se KFOR-i e mirëpret marrëveshjen e lehtësuar nga BE-ja për normalizimin e marrëdhënieve midis dy vendeve.

“Tashmë është thelbësore që të dyja palët të fillojnë zbatimin e detyrimeve të tyre sa më shpejt të jetë e mundur”, ka shtuar ai.

Komandanti i KFOR-it më tej ka thënë se ky mision është i përgatitur të veprojë nëse rrezikohet stabiliteti, siguria dhe liria e lëvizjes.

“Si komandant i KFOR-it, unë do të vazhdoj të luaj rolin tim në mbështetje të të gjitha përpjekjeve që synojnë krijimin e sigurisë së fundit për gjeneratat e ardhshme. Këtë do ta bëj në bashkëpunim të plotë me të gjithë aktorët përkatës dhe me të gjithë homologët e mi. Përfshirë Bashkimin Evropian, Kombet e Bashkuara, OSBE-në, përfaqësuesit e institucioneve të Kosovës dhe të organizatave të sigurisë së Kosovës, si dhe shefin e Shtabit të Forcave të Armatosura Serbe. KFOR-i do të vazhdojë të kryejë misionin e tij. Dhe është plotësisht e përgatitur – në përputhje me mandatin e saj të OKB-së – të veprojë nëse rrezikohet stabiliteti, siguria dhe liria e lëvizjes”, ka thënë ai.

Ky adresim është bërë disa ditë para se të mbahen zgjedhjet e jashtëzakonshme në katër komunat veriore në Kosovë.

Rruga Press