Këshilltarë komunalë në Moskë e Shën Petersbug me peticion për shkarkimin e Putinit

Përfaqësues nga 18 rrethe të Moskës dhe Shën Petersburgut në Rusi, kanë nisur një peticion për shkarkimin e presidentit të tyre Vladimir Putin për shkak të luftës në Ukrainë.

Peticionin e kanë firmosur 18 përfaqësues lokalë nga këto dy qytete, më të mëdhatë në Rusi, dhe letra është bërë publike nga Ksenia Torstrem, këshilltare komunale në rrethin e Shën Petersburgut.

“Teksti i peticionit është konciz dhe nuk diskrediton askënd. Nëse jeni përfaqësues lokal dhe dëshironi të bashkoheni, jeni të mirëpritur”, thuhet në përshkrimin që Torstrem ka lënë në Twitter të hënën, ndërkohë e ka shoqëruar edhe me fotot e dy fletëve të peticionit, një për arsyen dhe një për nënshkrimet.

“Ne, përfaqësuesit komunalë të Rusisë, besojmë se veprimet e Presidentit V. Putin dëmtojnë të ardhmen e Rusisë dhe qytetarëve të saj. Ne kërkojmë dorëheqjen e Vladimir Putin nga posti i presidentit të Federatës Ruse!”, thuhet në deklaratë.

Ndërkohë numri i këshilltarëve që kanë firmosur peticionin online, të martën ka shkuar në mbi 40.

Kremlini ka shtypur çdo protestë dhe ka shuar çdo zë kritike, sidomos që nga nisja e luftës në Ukrianë. Sipas mediave, janë arrestuar mbi 16 mijë aktivistë që kanë kritikuar luftën. Po ashtu, ka mbyllur edhe shumicën e mediave kritike të pushtetit të tij, transmeton Koha.

Peticioni i përfaqësuesve lokalë të këtyre dy qendrave të mëdha në Rusi përben kritiken më të madhe të brendshme që nga nisja e luftës më 24 shkurt, e që Moska e quan “operacion special”.

Rruga Press