Kemi marrë vetëm 10% të ndihmës së miratuar nga SHBA-ja, thotë Zelensky

Ukraina ka marrë vetëm 10% të ndihmës ushtarake të SHBA-së të miratuar nga Kongresi në fillim të këtij viti, ka deklaruar presidenti Volodymyr Zelensky në një video-fjalim të publikuar të mërkurën.

Rusia, e cila dërgoi dhjetëra mijëra trupa në Ukrainë në shkurt të vitit 2022, ka përshpejtuar përparimet e saj në lindje, raporton Reuters.

Ukraina po përgatitet gjithashtu për atë që mund të jetë dimri më i ashpër i luftës pasi sulmet ajrore ruse me rreze të gjatë shkatërruan atë që zyrtarët thonë se është rreth gjysma e kapacitetit të saj gjenerues të energjisë.

“Ti e bën punën tënde. Ti mbështetesh në rezerva, mbështetesh në brigada speciale, llogarit në pajisje të tilla. Dhe nëse merrni 10% të të gjithë paketës që tashmë është votuar… nuk është qesharake”, ka thënë Zelensky në anglisht për gazetarët nordikë të martën, deklaratë që u publikua e plotë në faqen e tij në Telegram të mërkurën.

Një paketë ndihme prej 61 miliardë dollarësh nga Shtetet e Bashkuara, e bllokuar nga republikanët në Kongres nga dhjetori i vitit të kaluar, është miratuar në prill.

Zelensky ka shtuar se ritmi i ngadaltë i furnizimeve me armë nuk është çështje financimi.

“Është gjithmonë çështja e burokracisë apo logjistikës, ideve apo skepticizmit… Këtë do t’ua japim, këtë jo”, është shprehur presidenti ukrainas.

Ai ka thënë gjithashtu se vendet e NATO-s ishin zotuar të furnizonin Ukrainën me gjashtë ose shtatë sisteme të mbrojtjes ajrore, në të cilat Ukraina mbështetet gjithnjë e më shumë për të zmbrapsur sulmet ruse me rreze të gjatë, deri në fillim të shtatorit, por se Kievi ende nuk i ka marrë të gjitha.

Rruga Press