Japonia kërkon buxhet rekord prej 56 miliardë dollarësh për mbrojtjen, rrit fokusin te teknologjia ushtarake

Japonia po përgatitet të rrisë ndjeshëm kapacitetet e saj ushtarake, teksa Ministria e Mbrojtjes ka kërkuar një buxhet rekord prej rreth 8.9 trilionë jenësh, ose 56 miliardë dollarë, për vitin fiskal 2027.

Kërkesa është 0.9% më e lartë se buxheti fillestar i vitit aktual dhe vjen në një kohë kur Tokio po përballet me shtimin e aktivitetit ushtarak të Kinës rreth territorit japonez, si dhe me forcimin e bashkëpunimit ushtarak mes Rusisë dhe Koresë së Veriut.

Në qendër të planit janë inteligjenca artificiale, dronët, raketat me rreze të gjatë veprimi, mbrojtja ajrore dhe kundër-raketore, hapësira dhe siguria kibernetike.

Ministria ka kërkuar rreth 1.8 miliardë dollarë për 17 dronë MQ-9B SeaGuardian, të cilët do të përdoren për forcimin e mbikëqyrjes detare, veçanërisht në zonat e Paqësorit. Gjithashtu, rreth 1 miliard dollarë është parashikuar për raketa hipersonike dhe pajisjet mbështetëse.

Një tjetër prioritet është zgjerimi i përdorimit të sistemeve pa pilot për mbikëqyrje, përcaktim objektivash dhe operacione sulmuese, me synimin për të reduktuar rrezikun ndaj personelit ushtarak.

Tokio planifikon gjithashtu integrimin më të gjerë të inteligjencës artificiale në analizimin e të dhënave ushtarake, identifikimin e objektivave dhe proceset e vendimmarrjes.

Paralelisht, qeveria synon të përmirësojë pagat, strehimin dhe kushtet e punës për pjesëtarët e Forcave të Vetëmbrojtjes, në përpjekje për të adresuar problemet me rekrutimin dhe mbajtjen e personelit.

Buxheti përfundimtar mund të jetë edhe më i lartë, pasi rreth 160 projekte do të rishikohen në kuadër të përditësimit të dokumenteve kryesore të sigurisë së Japonisë.

Kryeministrja Sanae Takaichi ka premtuar përshpejtimin e forcimit ushtarak të vendit, ndërsa Japonia po rishikon strategjinë e saj të mbrojtjes përballë ndryshimeve të shpejta të situatës së sigurisë në rajon.

Rruga Press