Izraeli bombardon Rafahun pavarësisht vendimit të GJND-së

Izraeli e ka bombarduar Rripin e Gazës, përfshirë Rafahun të shtunën, pavarësisht urdhrit të Gjykatës Ndërkombëtare të Drejtësisë (GJND) që shteti të “ndalojë menjëherë” ofensivën e tij ushtarake në qytetin jugor, raporton Agence France Presse (AFP).

Gjykata me bazë në Hagë të Holandës, urdhrat e të cilit janë ligjërisht të detyrueshëm, por i mungojnë mekanizmat e drejtpërdrejtë të zbatimit, e ka udhëzuar po ashtu Izraelin që ta mbajë të hapur kalimin kufitar ndërmjet Rafahut dhe Egjiptit, të cilin Izraeli e ka mbyllur para se të dërgonte trupat dhe tanket për të nisur ofensivën ushtarake atje.

Izraeli nuk ka dhënë ndonjë shenjë se po përgatitet për të ndryshuar veprimet në Rafah, duke insistuar se gjykata kishte gabuar.

Pavarësisht vendimit të GJND-së, Izraeli ka kryer sulme në Rripin e Gazës të shtunën në mëngjes, derisa luftimet janë rritur ndërmjet ushtrisë dhe krahut të armatosur të Hamasit. 

Dëshmitarët palestinezët dhe ekipet e AFP-së kane raportuar për sulmet izraelite në Rafah dhe në qendër të qytetit Deir al-Balah.

“Ne shpresojmë se vendimi i gjykatës do të bëjë presion ndaj Izraelit që ta përfundojë këtë luftë, sepse nuk ka mbetur asgjë tjetër këtu”, ka thënë Oum Mohammad al-Ashqa, një grua palestineze nga qyteti i Gazës, e zhvendosur në Deir al-Balah për AFP-në. 

Sipas saj, Izraeli është një shtet që e “konsideron veten mbi ligjin”.

Në vendimin e saj, GJND-ja thotë se Izraeli “duhet ta ndalë menjëherë ofensivën e tij ushtarake dhe aksionet e tjera në Rafah, të cilat mund t’i shkaktojnë grupit palestinez në Gaza kushte jetese që mund të sjellin shkatërrimin e tij fizik tërësisht ose pjesërisht”.

Rruga Press