Ish-zv/ministrja Rovena Voda del para GJKKO, afera u zbulua në dosjen e prokurorit të Kukësit, motër e vëlla të përfshirë në korrupsionin e zyrtarëve të lartë

Ish-zv.ministrja e Punëve të Brendshme, Rovena Voda ka dalë sot para trupës gjykuese të GJKKO, ku pritet të njihet me masën e sigurisë që do të caktohet për të. Voda aktualisht është lënë në masën e sigurisë “arrest shtëpie”. Ajo u paraqit sot në ambientet e GJKKO e shoqëruar nga një patrullë policie, të cilët kanë bërë shoqërimin e saj në gjykatë. Ish-zv.ministrja doli nga makina dhe hyri direkt për në GJKKO, pa u ndalur tek gazetarët që kanë qëndruar të pranishëm jashtë ambienteve të gjykatës.

Ndërkohë që janë zbuluar edhe të tjera informacione sesi u bë zbulimi i dosjes për të cilën akuzohet Rovena Voda. Rezulton se Voda është zbuluar gjatë përgjimeve të prokurorit të Kukësit, Edmond Karriqi, i cili gjithashtu akuzohet se ka marrë 2 mijë euro nga biznesmeni Emirjan Beu.

Beu është vëllai i Florida Beut, avokatja nga Durrësi që kërkoi punë në ministri me ndihmën e Vodës. Në 2019-ën, kur po hetohej Karriqi, përgjim pas përgjimi, SPAK përfundoi se ish-zv.ministrja e cila akuzohet se ka marrë 1 mijë euro cash, 1 telefon dhe 1 arkë me peshk.

A shkoi deri në fund punësimi i Beut? Jo. Procedura ngeli në mes, ndërkohë që SPAK pretendon se i ka të filmuara momentet kur ish-zv/ministrja ka marrë paratë, telefonin dhe peshkun. Sipas SPAK, ato janë marrë në momente të ndryshme dhe jo të gjitha njëherësh.

Bashkë me Vodën, në gjykatë sot janë edhe avokatet Florida Beu dhe Majlinda Hasani. Ato akuzohen për “Ushtrimi i ndikimit të paligjshëm ndaj personave që ushtrojnë funksione publike”. /dosja.al/