Ironizon Shkëlzen Gashi: Kryeministri i ka kontribuuar tensionimit të situatës me këto dy projektligje
Analisti politik Shkëlzen Gashi, ka reaguar edhe një herë për rrahjen dhe dhunën e djeshme, në Kuvendin e Kosovës, ku deputetë të Partisë Demokratike u përleshën fizikisht me ministra të Qeverisë së Kosovës.
Gashi, përmes një postimi në Facebook, ka ironizuar me situatën, duke thënë se ajo u tensionua për shkak të dy vendimeve të kryeministrit Albin Kurti.
“Kryeministri i Kosovës i ka kontribuuar tensionimit të situatës, sepse dje në mbledhjen e Qeverisë së Kosovës ka miratuar dy projektligje – për Konfiskimin e pasurisë së pajustifikueshme dhe për Këshillin Prokurorial të Kosovës”, ka shkruar Gashi.
Përleshja e djeshme nisi teksa në momentin kur po mbante fjalim kryeministri Kurti, zëvendëskryeministri Besnik Bislimi e largoi nga foltorja pankartën “Zdravo” të vendosur nga deputetët e PDK-së. Në atë moment, deputeti i PDK-së, Mërgim Lushtaku u afrua te foltorja dhe e lagu me ujë kryeministrin Kurti dhe zëvendëskryeministrin Bislimi, ku më pastaj filloi përleshja fizike.
Rruga Press