Inteligjenca britanike: Wagneri po synon të hyjë në Moskë përmes Voronezhit

Inteligjenca ushtarake e Britanisë së Madhe ka thënë se rebelimi i forcave mercenare të Wagnerit përfaqëson sfidën më të rëndësishme për shtetin rus në kohët e fundit.

“Në orët e para të 24 qershorit 2023, përplasja midis grupit Wagner të Yevgeny Prigozhin dhe Ministrisë së Mbrojtjes ruse u përshkallëzua në një konfrontim të plotë ushtarak. Në një operacion të karakterizuar nga Prigozhin si një ‘marshim për liri’, forcat e Wagnerit kaluan nga Ukraina e pushtuar në Rusi në të paktën dy vende”, thuhet në përditësimin e inteligjencës britanike.

“Në Rostov-në-Don, Wagner pothuajse me siguri ka pushtuar vendet kryesore të sigurisë, duke përfshirë shtabin që drejton operacionet ushtarake të Rusisë në Ukrainë”.

Njësi të tjera Wagner po lëvizin në veri përmes rajonit Voronezh, duke synuar të shkojnë në Moskë.

“Gjatë orëve në vijim, besnikëria e forcave të sigurisë së Rusisë, dhe veçanërisht e Gardës Kombëtare Ruse, do të jetë çelësi për mënyrën se si do të zhvillohet kriza. Kjo paraqet sfidën më të rëndësishme për shtetin rus në kohët e fundit”, thuhet në raportin e Britanisë së Madhe.

Rruga Press