Institucionet e drejtësisë në Shkodër ngrenë alarmin për rritjen e krimit ndër të mitur
Kreu i Gjykatës së Rrethit Shkodër Arbër Çela dhe prokurorja Franceska Lekani ngritën shqetësimin për rritjen e numrit të të miturve të përfshirë në krim, ndërsa folën për mungesë të gjyqtarëve të specializuar dhe trajtim të mangët të rasteve.
Gjatë takimit “Bashkëpunimin Ndër-Institucional për Drejtësinë për të Mitur”, kreu i Gjykatës së Rrethit Shkodër Arbër Çela ngriti shqetësimin për rrirjen e kriminalitetit ndër të mitur, rritje të gravitetit të veprave penale që kryejnë të miturit dhe probleme të sistemit që lejonte hapësira për përsëritje të krimit.
“Në ketë javë janë gjykuar tre çështje ku kanë qenë autor të mitur apo të abuzuar”, tha Çelaj gjatë tryezës që u organizua nga Bashkia Shkodër në bashkëpunim me Fondacionin “Zgjidhja e Konflikteve dhe Pajtimi i Mosmarrëveshjeve” (FZKPM), Qendrën për Zhvillim Komunitar “Sot për të Ardhmen” dhe UNICEF Shqipëri.
“Jemi në një fazë të neglizhencës për trajtimin e të miturve në konflikt më ligjin”, tha Çela, që fajësoi mungesën e gjyqtarëve të specializuar dhe largimet për shkak të vetingut.
Çela tha se ndërsa vendimet e gjykatave mund të ishin të sakta, ato dështonin të zgjidhin problematikën dhe të trajtonin si duhet të miturit. “Për ne çështje e mbyllur është ajo dosje që merr vendim të prerë, por ne nuk jemi marrë me problematikën dhe në këtë rast kemi mbyllur një çështje, por kemi lenë të hapur disa faktor që sjell ripërseritjen e krimit”, tha kreu i gjykatës.
Gjithashtu përfaqësuesja e Prokurorise Shkodër , prokurorja Franceska Lekani, pranoi se gjatë dy viteve të fundit ka rritje të rasteve të përshirjes së të miturve në krime të rënda. “Janë 33 të mitur në konflikt me ligjin për vitin 2020 të cilët janë dërguar në gjykatë si të pandehur. Ndërkohë që në 9 muajt e parë të këtij viti janë kryer 22 procedime penale dhe 23 të mitur janë marrë në cilësinë e të pandehurit. Nuk janë vepra të parëndësishme, por janë vepra shumë të rënda”, tha Lekani.
Kryebashkiakja Voltana Ademi tha se Bashkia Shkodër në punën e saj ka prioritet të lartë fëmijët, por pranoi se ata ishin të ekspozuar ndaj krimit dhe kërkoi më shumë masa parandaluese. /reporter.al/
Rruga Press